पोलिस दलावर करोनाचे संकट; २४ तासांतील 'हे' आकडे चिंताजनक

मुंबईः राज्यात करोनाचे संकट गडद होत असताना महाराष्ट्र पोलिस दलातही करोनाचा संसर्ग वाढत आहे. गेल्या २४ तासांत तब्बल १६१ पोलिसांचा अहवाल पॉझिटिव्ह आला आहे. तर एका पोलिसाचा उपचारादरम्यान मृत्यू झाला आहे. राज्यातील पोलिसांना होणार वाढता संसर्ग हा चिंता वाढवणारा आहे.

महाराष्ट्रात गेल्या सहा महिन्यांहून अधिक काळापासून करोना संसर्गाच्या संकटाविरुद्ध पोलिस लढा देत आहेत. त्याचबरोबर, अनलॉकची प्रकिया सुरू झाल्यानंतर राज्यातील अनेक नियम शिथील करण्यात आले आहेत. त्यामुळं काही ठिकाणी नागरिकांची गर्दीही वाढत चालली आहे. या परिस्थीतीत पोलिसांवर अधिक भार आहे. राज्यातील सर्व विभागांतील पोलिस दलात करोनानं शिरकाव केला आहे. त्यामुळं राज्यातील करोनाबाधित पोलिसांचा आकडा २१ हजार ९८८ इतका झाला आहे. तर ३, ३८१ अॅक्टिव्ह रुग्णांवर उपचार सुरू आहेत.


पुण्याच्या जंबो कोव्हिड सेंटरमधून तरुणी बेपत्ता; रुग्णालयाबाहेर संतप्त नातेवाईकांचे आमरण उपोषण

राज्यात आत्तापर्यंत २३५ पोलिसांना करोनामुळं जीव गमवावा लागला आहे. तर, दिलासादायक बाब म्हणजे १८ हजार ३७२ पोलिसांनी करोनावर यशस्वी मात केली आहे. सध्या राज्यात २१ हजार ९८८ पोलिस करोना पॉझिटिव्ह आहेत. त्यात २, ३९८ अधिकारी व १९ हजार ५९० पोलिस कर्मचारी असल्याची माहिती एका अधिकाऱ्यानं दिली आहे. दरम्यान, करोनामुळं मृत्यू झालेल्या पोलिसांमध्ये २३ अधिकारी आणि २१२ कर्मचाऱ्यांचा समावेश आहे. मृतांचा आकडा पोलिस प्रशासन आणि त्यांच्या कुटुंबीयांची चिंता वाढविणारा आहे. मुंबई पोलिसांत अनेक वरिष्ठ अधिकाऱ्यांना करोनाची बाधा झाली असून यामुळे त्यांच्या संपर्कात आलेले कनिष्ठ अधिकारी यांनाही विलगीकरणात जावे लागल्याने पोलिसांवर कामाचा ताण पडत आहे. अनेक पोलिस वसाहतींमध्ये करोना पॉझिटिव्ह असल्याने कुटुंबिय देखील चिंतेत आहेत.

सरकारची चिंता वाढली! नगरविकास मंत्री एकनाथ शिंदे यांना करोना

राज्य पोलिस दलात करोनाचा संसर्ग पाहता सरकारनं एक महत्त्वाचा निर्णय घेतला आहे. करोनामुळं मृत्यू झालेल्या पोलिसांच्या परिवाराला सरकारकडून आर्थिक मदत देण्यात येणार आहे. तसंच. पोलिसांच्या कुटुंबीयांना संबंधित पोलिस अधिकारी किंवा कर्मचाऱ्यांच्या सेवानिवृत्तीच्या तारखेपर्यंत सरकारी निवासस्थानात वास्तव्य करता येणार आहे.