म. टा. खास प्रतिनिधी, मुंबई
अंधेरीतील साकीनाका येथून बड्या ब्रँडच्या महागड्या टोनर, कार्टेज, इंकची हुबेहुब नक्कल आणि विक्रीचे तंत्र गुन्हे शाखेने मोडीत काढले आहे. साकीनाक्यातील ए.एच. कंपाउंडमध्ये बनावट टोनर, कार्टेज, इंकची विक्री होत असल्याची माहिती मिळाल्यावरून गुन्हे शाखेच्या युनिट १० च्या पथकाने गुरुवारी कारवाई केली. त्यावेळी सुमारे ४३ लाख रुपये किंमतीच्या बनावट साहित्यासह नरशी चौधरी (४२) अटक करण्यात आली.
अंधेरीतील साकीनाका भागात कम्प्युटरसाठी लागणाऱ्या साहित्यांची हुबेहूब नक्कल केली जात असल्याची कुणकूण 'इन्फोर्सेस ऑफ इंटलेक्च्युअल प्रॉपर्टी राइट्स' (ईआयपीआर) कंपनीस लागली. या कंपनीने गुन्हे शाखेच्या युनिट १० कडे त्याबाबतची सर्व माहिती दिली. त्याचे महत्त्व लक्षात घेत युनिट १० च्या पथकाने कारवाईचा निर्णय घेतला. त्यासाठी मिळालेल्या माहितीची खातरजमा करण्याचे काम करण्यात आले. त्यानंतर युनिट १० चे प्रभारी सुनील माने, सहाय्यक निरीक्षक धनराज चौधरी आणि पथकाने कारवाई केली.
त्या कारवाईत अंधेरी कुर्ला मार्गावरील गुप्ता पेट्रोल पंपाकडील ए. एच. कंपाउंडमधील गाळ्यांत बनावट साहित्याचे उत्पादन सुरू असल्याचे लक्षात आले. या कारवाईत एचपी, सॅमसंग, कॅनन, अॅपसन आदी बड्या कंपन्यांच्या बनावट टोनर, कार्टेज आदींचा साठा आढळला. या सर्व टोनरची किंमत ४३ लाख ४७ हजारांवर आहे. त्यासंदर्भात कॉपीराइट कायद्यातंर्गत गुन्हा नोंदवून कारवाई करण्यात आली आहे.