'त्या' रॉंग नंबरने अॅसिड पीडितेचे आयुष्य बदलले!

मटा ऑनलाइन वृत्त। मुंबई

अॅसिड हल्ल्यातील पीडिता २६ वर्षीय ललिता बेनबंसीला कदाचित या गोष्टीची कल्पनाही नसेल की, एका 'रॉंग नंबर'मुळे तिचे आयुष्यच बदलून जाईल. पण तो 'राँग' नंबरच तिच्या आयुष्यात 'राइट' ठरला आणि ललिता मंगळवारी तिच्या मिस्टर परफेक्ट राहुल कुमार सोबत विवाहबद्ध झाली. खरंतर या दोघांची गोष्ट कोणत्याही बॉलिवूड सिनेमापेक्षा वेगळी नाही.

मुळच्या उत्तर प्रदेशच्या आजमगढ येथील ललितावर तिच्या भावांनीच परस्पर द्वेषातून २०१२ साली अॅसिड हल्ला केला होता. त्यात ललिताचा पूर्ण चेहरा जळून गेला होता. तेव्हापासून आतापर्यंत ललितावर १७ शस्त्रक्रिया केल्या गेल्या असून लग्नानंतरही पुढील उपचार सुरू राहणार आहेत. ललिता आणि राहुल यांचे प्रेम एका राँग नंबरने सुरू झाले होते. एक दिवस राहुलने चुकून ललिताचा नंबर डाएल केला आणि त्यानंतर अवघ्या दोन महिन्यांमध्येच या दोघांनी लग्नाचा निर्णय घेतला. २७ वर्षीय राहुल सीसीटीव्ही ऑपरेटर आहे.

लग्नामुळे खूष झालेली ललिता सांगते, 'अॅसिड हल्ल्यानंतर माझे लग्न होईल, असे मला कधी वाटलेच नव्हते. पण राहुलला माझ्याविषयी सर्व कळूनही त्याने माझ्याशी लग्न करण्याचा निर्णय घेतला.' तर, मोठ्या मनाचा राहुल सांगतो, ललिताचं मन खरं आहे आणि माझ्यासाठी हेच महत्त्वाचं आहे. आपण काहीतरी वेगळं करावं हे माझं स्वप्न होतं. ललिताशी लग्न करण्याच्या माझ्या निर्णयाला माझ्या कुटुंबीयांनीदेखील साथ दिली. पण एखादा राँग नंबर माझं आयुष्य बदलेल याची मलाही कल्पना नव्हती.'

अॅसिड हल्ल्यानंतर ललिताला 'साहस फाऊंडेशन' या स्वयंसेवी संस्थेने मदतीचा हात दिला. संस्थेने दिलेल्या माहितीनुसार, ललिताला मदत करण्यासाठी चित्रपट क्षेत्रातील अनेक कलाकार मंडळीही पुढे आली. अभिनेता विवेक ओबेरॉयने ललिताला ठाण्यात एक फ्लॅट आहेर म्हणून दिला आहे, तर डिझायनर अबू जानी आणि संदीप खोसला यांनी तिच्या लग्नासाठी कपडे आणि नेकलेस तिला भेट दिले.