बेस्टच्या ताफ्यात ५५ मिनी एसी बसगाड्या
म. टा. खास प्रतिनिधी, मुंबई
मुंबईकरांचा बेस्टचा प्रवास गारेगार करण्यासाठी बेस्टच्या ताफ्यात ५५ मिनी वातानुकूलित बसेस दाखल झाल्या आहेत. याअंतर्गत आणखी काही मार्गांवर वातानुकूलित मिनी बसची सेवा सुरू करण्यात आली असून यामुळे बेस्टच्या प्रवाशांना मोठा दिलासा मिळणार आहे.
बेस्टच्या ताफ्यात खासगी तत्त्वावरील वातानुकूलित मिडी, मिनी आणि साध्या मिडी, मिनी प्रकारातील बसगाड्यांचा टप्प्याटप्प्याने समावेश होत आहे. मुंबईच्या रस्त्यांवर धावणाऱ्या या मिनी बस हळुहळू प्रवाशांच्या पसंतीस उतरत आहेत. प्रवाशांचा वाढता प्रतिसाद पाहता शहरातील काही मार्गावर मिनी वातानुकूलित बसगाड्यांची सेवा सुरू करण्यात आली आहे. त्यामध्ये (ए-५४) कोहिनूर पीपीएल ते सिद्धिविनायक मंदिर मार्गे, (ए-५५) कोहिनूर पीपीएल (गडकरी चौक) ते सिद्धिविनायक मंदिर मार्गे, (ए-१२२) बॅलार्ड पियर ते अहिल्याबाई होळकर चौक, चर्चगेट, (ए-१६७) कॉ. प्र. कृ. कुरणे चौक, वरळी ते प्रभादेवी रेल्वे स्थानक पश्चिम, (ए-३५२) राणी लक्ष्मीबाई चौक, सायन ते ट्रॉम्बे, (ए-२५१ आणि ए-२४९) अंधेरी स्थानक पश्चिम ते सातबंगला बसस्थानक, (ए-२२१), अंधेरी स्थानक पश्चिम ते जेव्हीपीडी बसस्थानक, (ए-२५४) अंधेरी स्थानक पश्चिम ते वीरा देसाई मार्ग, (ए-२४८) अंधेरी स्थानक पश्चिम ते रमेश नगर, (ए-२३५ आणि ए-२४२) अंधेरी स्थानक पश्चिम ते मॉन्जिनिज केक शॉप या मार्गावर मिनी वातानुकूलित बसेस धावत आहेत. त्यामुळे प्रवाशांना अवघ्या सहा रुपयात वातानुकूलित बसने प्रवास करता येणार आहे.