बंदुकीच्या धाकाने ३० लाख लुटले

मुंबई : बंदुकीच्या धाकाने दिवसाढवळ्या एका व्यापाऱ्याकडून ३० लाखाला लुटल्याच्या घटनेमुळे नागपाडा परिसरात एकच खळबळ उडाली आहे. या प्रकरणी पोलिस सीसीटीव्हीद्वारेआरोपीचा शोध घेण्याचा प्रयत्न करत असून नागपाडा पोलिस ठाण्यात चौघांविरोधात गुन्हा नोंदवण्यात आला आहे.

मुंबई सेंट्रल येथील डॉ. भडकमकर मार्गावरील एका सोसायटीत राहणारे विक्रम पुरोहित हे व्यापारी असून जवळच त्यांचे दुकान आहे. मंगळवारी दुपारी ४ च्या सुमारास काही कामानिमित्त विक्रम हे सहकारी चंपालाल यांच्यासोबत दुचाकीहून घरी जाण्यासाठी निघाले. त्यावेळी एका व्यवहारातील ३० लाख रुपये घरी ठेवण्यासाठी त्यांनी सोबत घेतले होते. काही अंतरावर विक्रम यांची दुचाकी मागून आलेल्या दोन दुचाकीवरील व्यक्तींनी थांबवली. भररस्त्यात एकाने बंदूक दाखवत त्यांच्याकडील ३० लाख रुपये हिसकावले.