करोनानं वाढवली डोकेदुखी! राज्यात एका दिवसात करोनाचे ३२८ नवे रुग्ण, मुंबईत एकाचा मृत्यू

म. टा. विशेष प्रतिनिधी, मुंबई : राज्यात सोमवारी करोनाच्या ३२८ नव्या रुग्णांचे निदान झाले असून, एका मृत्यूची नोंद झाली आहे. मृत्युमुखी पडलेली ५१वर्षीय महिला मुंबईची असून, तिला फुफ्फुसाचा दीर्घकालीन आजार होता.

मुंबईत नव्या करोना रुग्णवाढीत घट दिसून आली. मुंबईत सोमवारी ९५ रुग्णांची नोंद झाली असून, त्यापैकी २८ जणांना रुग्णालयामध्ये दाखल करावे लागले. तर पाच रुग्णांना ऑक्सिजनची गरज भासली. रुग्णालयात दाखल रुग्णांची संख्या १०२ असून, राज्यात रुग्णांची संख्या ४६६७ आहे. मुंबई, ठाणे, पुणे, नागपूर येथे रुग्णांची संख्या इतर जिल्ह्यांच्या तुलनेत अधिक असून, मुंबईत सर्वाधिक म्हणजे १४५४, ठाणे ८५०, पुणे ७५६ तर, नागपूरमध्ये ३३६ उपचाराधीन रुग्ण आहेत. मुंबई ठाणे आणि पुणे येथे रुग्णांची संख्या वाढत असली, तरी गडचिरोली, भंडारा, बुलढाणा, वाशीम, हिंगोली, जळगाव, नंदुरबार, धुळे, जालना जिल्ह्यांतील रुग्णसंख्या दहाहून कमी आहे. परभणी येथे एकाही रुग्णाची नोंद झालेली नाही.

आंतरराष्ट्रीय प्रवाशांचे सर्वेक्षण

सरकारच्या सूचनेनुसार २४ डिसेंबर, २०२२पासून राज्यातील मुंबई, पुणे, नागपूर आंतरराष्ट्रीय विमानतळावर प्रवाशांचे सर्वेक्षण सुरू आहे. दोन टक्के प्रवाशांचे नमुने चाचणीसाठी घेण्यात येत असून, त्यातील प्रत्येक नमुना जनुकीय क्रमनिर्धारणासाठी पाठविण्यात येत आहे. ६४ नमुने आरटीपीसीआर आणि जनुकीय तपासणीसाठी पाठवण्यात आले आहेत. या चाचणीतून मुंबईतून १४, १२ पुणे, नवी मुंबई, वसई, विरार, अमरावती, सांगली, छत्रपती संभाजीनगर, सातारा, नागपुरातील प्रत्येकी एक तर सहा गुजरातचे प्रवासी पॉझिटिव्ह असल्याचे समोर आले.



पाच रुग्ण उत्तर प्रदेश, तीन रुग्ण केरळ, ओडिशा, तमिळनाडू, राजस्थान, पश्चिम बंगाल येथील प्रत्येकी दोन; तर गोवा, आसाम, बिहार, तेलंगण, हैदराबाद, चेन्नई, पंजाब आणि दिल्ली येथील प्रत्येकी एका प्रवाशाची चाचणी पॉझिटिव्ह आली.