७० वर्षीय आईचा मुलीकडून छळ

नग्न करून मारहाण, दिवसातून एकदाच जेवण

म. टा. खास प्रतिनिधी, मुंबई

कांदिवली लोखंडवाला येथे राहणाऱ्या एका ७० वर्षीय वृद्धेचा पोटच्या मुलीकडून शारीरिक आणि मानसिक छळ केला जात असल्याचा प्रकार उघडकीस आला आहे. याप्रकरणी समतानगर पोलिस ठाण्यात पालक तसेच ज्येष्ठ नागरिकांचे कल्याण आणि देखभाल, कायदा २००७ अंतर्गत गुन्हा दाखल करण्यात आला आहे. मुलगी उपाशी ठेवत असून नग्न करून मारहाण करीत असल्याचा आरोप या वृद्ध महिलेने तक्रारीत केला आहे.

पंधरा वर्षांपासून लोखंडवाला येथे वास्तव्यास असलेल्या कामिनी (बदललेले नाव) एमटीनएलमध्ये नोकरीला होत्या तर त्यांचे पती आयकर अधिकारी होते. कामिनी यांना पाच मुली असून या सर्वांची लग्नं झाली आहेत. यातील दोघी परदेशात, दोघी मुंबईत तर एक मुलगी कामिनी यांच्यासोबत तिच्या परिवारासह राहते. गेल्या दोन ते तीन वर्षांपासून घरातील संपत्तीवरून कामिनी यांचा त्यांच्यासोबत राहणाऱ्या मुलीसोबत वाद सुरू झाला. तेव्हापासून या मुलीने कामिनी यांचा छळ करण्यास सुरुवात केली. चार महिन्यापूर्वी संतापाच्या भरात मुलीने जमिनीवर पाडून छातीवर बसून मारहाण केल्याचा आरोप कामिनी यांनी तक्रारीत केला आहे. या मारहाणीत डाव्या हाताला फ्रॅक्चर झाल्याचे त्यांनी तक्रारीत नमूद केले आहे. यानंतर काही दिवस त्रास कमी असल्याने त्यांनी तक्रार केली नव्हती.

संपत्तीचा वाद अधिक पेटल्याने मुलीने पुन्हा छळण्यास सुरुवात केली. दिवसातून कधीतरी एकदा खायला देऊन उपाशी ठेवणे. स्नानगृहात नग्न करून मारहाण करणे असे प्रकार वारंवार घडू लागले. कामिनी यांची सर्व डेबिट कार्ड, आधारकार्ड, बँकांचे चेकबुक हे सर्व मुलीने काढून घेतले. आई कुणाला तरी सांगेल म्हणून तिला मोबाइलही काढून घेतला. रोजच्या छळाला कंटाळलेल्या कामिनी यांनी अखेर समता नगर पोलिस ठाण्यात तक्रार केली.