मुंबईतील पाच दिग्गज डॉक्टर महापालिकेच्या सेवेत

मुंबई: खाजगी रुग्णालयांमध्ये काम करणारे पाच दिग्गज डॉक्टर यापुढे महापालिकेच्या रुग्णालयांमध्ये सेवा करणार आहेत. डॉ अमित मायदेव, डॉ. सुलतान प्रधान,डॉ. मुफझ्झल लकडवाला, डॉ. संजय बोरुडे आणि डॉ. नीता वर्ती अशी या पाच डॉक्टरांची नाव असून बीएमसीच्या विविध रुग्णालयांमध्ये त्यांना मानद प्राध्यापकपदही देण्यात आलं आहे.


डॉ मायदेव गॅस्ट्रोइन्टरनोलॉजिस्ट असून ग्लोबल हॉस्पिटल येथे कार्यरत आहेत. डॉ प्रधान ऑन्कोलोजिस्ट असून ब्रिच कॅण्डी आणि प्रिन्स अली खान रुग्णालयात कार्यरत आहेत. डॉ लकडवाला आणि डॉ बोरुडे मुंबईतील ख्यातनाम बॅरिअॅटिक सर्जन आहेत. तर डॉ वर्ती गायनॉकोलॉजिस्ट आहेत.


मुंबईतील खाजगी रुग्णालयांमध्ये काम करणाऱ्या सर्वोत्कृष्ट डॉक्टरांनी काही वेळ महापालिका इस्पिताळातील रुग्णांची सेवा करावी तसंच येथील कनिष्ठ डॉक्टरांना प्रशिक्षण द्यावं ही संकल्पना मुंबईच्या आरोग्य विभागाच्या उप आयुक्त अश्विनी जोशी यांनी मांडली होती. त्यानुसार या पाच डॉक्टरांची निवड करण्यात आली आहे. यापैकी डॉ बोरुडे सायन येथील महापालिका रुग्णालयात, डॉ. मायदेव केईएममध्ये तर डॉ. प्रधान नायर रुग्णालयात सेवा देणार आहेत. या नोव्हेंबरपासून मी केईएममध्ये रुजू होईन अशी माहिती डॉ. मायदेव यांनी दिली आहे. या डॉक्टरांनी संबंधित रुग्णालयांच्या डीन्सशीही चर्चा केली आहे.