विद्यापीठाचा ५७ कोटींचा तुटीचा अर्थसंकल्प

sourabh.sharma1@timsegroup.com

@sourabhsMT

मुंबई : मुंबई विद्यापीठाचे माजी कुलगुरू डॉ. संजय देशमुख यांनी गेल्या वर्षी शिलकीचा अर्थसंकल्प सादर करून सगळ्यांचे लक्ष वेधल्यानंतर यंदा विद्यापीठ प्रशासनावर पुन्हा तुटीचा अर्थसंकल्प सादर करण्याची वेळ आली आहे. यंदा मुंबई विद्यापीठ प्रशासनाकडून सुमारे ५७ कोटी रुपयांचा तुटीचा अर्थसंकल्प सादर केला जाणार असल्याचे कळते. विद्यापीठाकडून सुमारे ५७२.६० कोटींचा अर्थसंकल्प शुक्रवारपासून सुरू होणाऱ्या सिनेटमध्ये सादर केला जाणार असल्याची माहिती 'मटा'च्या हाती आली आहे.

मुंबई विद्यापीठाचा सन २०१८-१९ या शैक्षणिक वर्षाचा अर्थसंकल्प सादर करण्यासाठी विद्यापीठातर्फे दोन दिवसीय सिनेट सभेचे आयोजन ३० आणि ३१ रोजी करण्यात आले असून शुक्रवारी या अधिवेशनाचा पहिला दिवस आहे. पहिल्याच दिवशी अर्थसंकल्प सादर होण्याची शक्यता असून यंदा या अर्थसंकल्पात कोणत्या नवीन गोष्टी आहेत, याबद्दल उत्सुकता आहे. या अर्थसंकल्पात एकूण जमा ५२१ कोटी रुपये दाखविण्यात आली असून अंदाजे खर्च ५७२ कोटींचा दाखविण्यात आला आहे.

मुंबई विद्यापीठाचे प्रभारी कुलगुरू डॉ. देवानंद शिंदे यांच्या कारकिर्दीमधील हा पहिला अर्थसंकल्प आहे. यंदाच्या या अर्थसंकल्पात विद्यापीठ प्रशासनाकडून विद्यार्थी भवन नव्याने उभारण्यात येणार असून त्यासाठी २ कोटी रुपयांच्या निधीची तरतूद आहे. तर विद्यापीठाकडून वस्तुंग्रहालयही बांधण्यात येणार असून त्यासाठी ३ कोटी ५० लाख रुपयांची तरतूद असल्याचे कळते. राष्ट्रीय मूल्यांकनात महत्त्वाचे मानले जाणारे प्लेसमेंट सेल उभारण्यात येणार असून त्यासाठी १० कोटी रुपयांच्या निधीची तरतूद आहे. तर त्याबरोबरच प्राध्यापकांच्या संशोधनाला प्रोत्साहन देण्यासाठी २० लाखांच्या निधीची तरतूद असेल. त्याचबरोबर नरेंद्र मोदींच्या स्किल इंडिया या संकल्पनेला प्रोत्साहन देण्यासाठी सेंटर फॉर स्किल अॅण्ड आंत्रप्रेनरशिप डेव्हलपमेंटसाठी १ कोटी रुपयांचा निधी दिला जाणार असल्याचे कळते.

ऑडिट संथगतीने

यंदा विद्यापीठाकडून २०१२-१३ सालचे ऑडिट मंजुरीसाठी ठेवण्यात येणार असल्याची माहिती सूत्रांकडून देण्यात आली. त्यामुळे ऑडिटबाबत विद्यापीठ प्रशासन उदासीन असल्याचे चित्र आहे.