करोनाचा विळखा वाढतोय! राज्यात दिवसभरात ६२० नव्या रुग्णांची नोंद; दोघांचा मृत्यू

म. टा. विशेष प्रतिनिधी, मुंबई : राज्यात रविवारी ६२० करोना रुग्ण आढळले असून, दोन करोनाबाधित रुग्णांचा मृत्यू झाला. सध्या राज्यातील मृत्युदर १.८२ टक्के एवढा आहे. राज्यात रविवारी ६२० करोना रुग्ण सापडले आहेत. आतापर्यंत राज्यातील करोनाबाधित रुग्णांची संख्या ८१ लाख ५५ हजार ८३९ इतकी झाली आहे.

सध्या राज्यात ५ हजार ९१६ सक्रिय रुग्ण आहेत. राज्यात रविवारी दोन करोना बाधित रुग्णाचा मृत्यू झाला आहे. राज्यातील मृत्युदर १.८२ टक्के एवढा आहे. राज्यामध्ये रविवारी ७७९ रुग्ण बरे झाले असून, त्यांना घरी सोडण्यात आले आहे. राज्यात आजपर्यंत एकूण ८० लाख १ हजार ४४४ बाधित रुग्ण बरे झाले आहेत. यामुळे राज्यातील रुग्ण बरे होण्याचे प्रमाण ९८.११ टक्के एवढे झाले आहे.

नव्या उपप्रकाराचे ६२७ रुग्ण

राज्यात ‘एक्सबीबी.१.१६’ या करोनाच्या नव्या उपप्रकाराचे १ जानेवारीपासून आत्तापर्यंत ६२७ रुग्ण बाधित झाले आहेत. तर ६२ जणांचा मृत्यू झाला आहे. त्यापैकी ७०.९७ टक्के रुग्ण ६० वर्षांवरील आहेत. तर ५८ टक्के सहबाधित, १० टक्के सहबाधित नसलेले आणि ३२ टक्के रुग्णांची अद्याप माहिती प्राप्त झालेली नाही.
मोठा दिलासा! मे महिन्यात करोना रुग्णांची संख्या घटणार, तज्ज्ञांनी सांगितलं महत्त्वाचं कारण
‘एक्सबीबी.१.१६’ या उपप्रकाराने बाधित असलेल्या रुग्णांपैकी ५,७४१ रुग्ण गृहविलगीकरणात आहेत. तसेच ३०६ रुग्णांना रुग्णालयात दाखल करण्यात आले असून, ४८ रुग्ण आयसीयूमध्ये दाखल आहेत.