यंदाच्या लॉटरीसाठी ६३ हजार अर्ज

मुंबई : म्हाडाच्या घरांच्या लॉटरीचे अर्ज सादर करण्याची मुदत गुरुवारी मध्यरात्री संपुष्टात आली. यंदाच्या लॉटरीसाठी ६३ हजार ३४२ अर्ज दाखल झाले आहेत. आता १० नोव्हेंबर रोजी घरांची लॉटरी काढण्यात येईल. त्यात भाग्यवंत विजेत्यांना हक्काचे घर मिळणार आहे.

म्हाडाने यंदाच्या लॉटरीत ८१९ घरांचा समावेश केला आहे. गुरुवारी मध्यरात्री या घरांच्या लॉटरीसाठी अर्ज सादर करण्याची मुदत संपुष्टात आली. या लॉटरीसाठी यंदा ७८ हजार ६७४ अर्ज आले, पण त्यातील ६३ हजार ३४२ इच्छुकांनी प्रत्यक्षात घरांसाठी पैसे भरले आहेत. आता अर्जदारांची प्राथमिक यादी ६ नोव्हेंबर रोजी सायंकाळी म्हाडाच्या वेबसाइटवर प्रसिद्ध होईल. त्यानंतर ८ नोव्हेंबर रोजी सकाळी अकरा वाजता अर्जदारांची अंतिम यादी वेबसाइटवर प्रसिद्ध होईल. १० नोव्हेंबर रोजी सकाळी दहा वाजता वांद्रे येथील रंगशारदा सभागृहात या घरांची लॉटरी काढण्यात येईल.