मंडपांविषयीचे ६४६ अर्ज नाकारले

मुंबई : मुंबई उच्च न्यायालयाने दिलेल्या आदेशाप्रमाणे मुंबई महापालिकेने नियमांचे उल्लंघन करणाऱ्या उत्सवी मंडपांवर कारवाई केली असून त्याप्रमाणे यावर्षी ६४६ अर्ज नाकारण्यात आले. तसेच यावर्षी प्रथमच गणेशोत्सवादरम्यान मंडपांविषयी परवानगी देताना ऑनलाइन अर्जही स्वीकारण्यात आले, अशी माहिती मुंबई महापालिकेने गुरुवारी उच्च न्यायालयात दिली. ते पाहिल्यानंतर महापालिकेने न्यायालयाच्या आदेशाचे बऱ्यापैकी पालन केले असल्याचे समाधान न्यायालयानेही व्यक्त केले.

उत्सवांदरम्यान होणारे ध्वनी प्रदूषण व मंडपांसाठी रस्त्यांची अडवणूक याविषयी ठाण्यातील डॉ. महेश बेडेकर व अन्य काहींनी केलेल्या जनहित याचिकांवर न्या. अभय ओक यांच्या नेतृत्वाखालील खंडपीठासमोर पुढची सुनावणी झाली. त्यावेळी मुंबई महापालिकेतर्फे ज्येष्ठ वकील अनिल साखरे यांनी माहिती दिली.