पुणे-महाड बसला अपघात
म. टा. वृत्तसेवा, अलिबाग
महाडजवळील वाघजाई घाटातील अवघड वळणावरच एसटीमध्ये तांत्रिक बिघाड झाल्याचे लक्षात येताच, चालकाने प्रसंगावधान राखत शर्थीच्या प्रयत्नांनी बस थांबवल्याने बसमधील ७६ प्रवाशांचे प्राण वाचले. ही बस दरीच्या अगदी काठावर येऊन थांबली. मोहन बांदल असे या चालकाचे नाव असून त्यांनी प्रसंगावधान राखले नसते, तर आंबेनळी घाटाप्रमाणेच बस खोल दरीत कोसळून मोठी प्राणहानी झाली असती. चालक मोहन बांदल यांनी बसवर वेळीच ताबा मिळवल्याने सर्व प्रवासी सुखरुप बचावल्याची प्राथमिक माहिती महाड आगारातून देण्यात आली.
पुणे महाड मार्गावरील ही एसटी बस (एमएच १४/ बीटी ३८४७) शुक्रवारी सकाळी आठ वाजता भोर आगारातून चालक ७६ प्रवाशांना घेऊन महाडच्या दिशेने रवाना झाली होती. दुपारी बाराच्या सुमारास ही बस वाघजाई घाटामध्ये आली. वाघजाई मंदिरापासूनच्या महाड हद्दीतील दुसऱ्या वळणावर ही बस आली असता, बसमध्ये तांत्रिक बिघाड झाल्याचे चालक मोहन बांदल यांच्या लक्षात आले. येथील धोकादायक वळणाच्या टोकावर बस आली असतानाच, बांदल यांनी शर्थीचे प्रयत्न करत बसचे ब्रेक दाबले. त्यांच्या या प्रयत्नांमुळे बस दरीच्या अगदी काठावर येऊन थांबली. बसमधून सर्व ७६ प्रवासी उतरल्यानंतर त्यांना आपल्यावर काय प्रसंग ओढावला होता, याची कल्पना आली.