मुंबई: करोनाग्रस्त नातवाच्या 'त्या' चुकीमुळं ८६ वर्षीय डॉक्टरचा मृत्यू ओढवला

म. टा. विशेष प्रतिनिधी, मुंबई

करोना विषाणूचा संसर्ग झालेल्या ठाकुरद्वार, गिरगाव येथील एका ८६ वर्षीय डॉक्टरचा शुक्रवारी मुंबईतील खासगी रुग्णालयात मृत्यू झाला. सात दिवसांपूर्वी अमेरिकेतून आलेल्या डॉक्टर नातवाकडून या ज्येष्ठ डॉक्टरला करोनाची लागण झाली होती. या डॉक्टर नातवाने घरातच अलगीकरणाचा सल्ला न मानल्याने कार्डियाक सर्जन असलेला या ज्येष्ठ डॉक्टरचा मुलगा तसेच कुटुंबातील अन्य चौघांनाही करोनाची लागण झाली आहे.

ज्येष्ठ डॉक्टरच्या मृत्यूनंतर त्यांना ज्या खासगी रुग्णालयात दाखल करण्यात आले होते, तेथील डॉक्टर आणि १५ वैद्यकीय कर्मचाऱ्यांचे विलगीकरण करण्यात आले असून सर्वांचे थुंकीचे नमुने घेण्यात आले आहेत. या रुग्णालयामध्ये तसेच या भागातील रहिवाशांमध्ये भीतीचे वातावरण पसरले आहे. दरम्यान, खासगी रुग्णालयातील डॉक्टर कुणाकुणाच्या संपर्कात आले त्यांचाही शोध सुरू आहे. त्यामुळे या रुग्णालयाचा रेडिओलॉजी विभाग सध्या बंद ठेवण्यात आला आहे. डॉक्टर असूनही अलगीकरणाचा सल्ला न पाळल्यामुळे त्याची शिक्षा इतरांनाही भोगावी लागली.

करोना Live: 'ही वेळ सकारात्मकता वाढवण्याची'

मोदींनी पुण्यातील नर्सशी साधला मराठीतून संवाद

लोकमान्य टिळक मार्ग पोलिसांनी दिलेल्या माहितीनुसार, मृत डॉक्टरचा नातू १२ मार्च रोजी परदेशातून आला. त्यांना १४ दिवस घरात विलगीकरण करून राहण्यास सांगण्यात आले होते. पालिकेकडून याबाबत माहिती मिळाल्यानंतर पोलिसांचे पथक दररोज घरी जाऊन नातू विलगीकरणात आहे का याची पाहणी करीत होते. याचदरम्यान गुरुवारी त्याच्या आजोबांची प्रकृती ढासळल्याने त्यांना रुग्णालयात दाखल करण्यात आले. त्या रुग्णालयातून दुसऱ्या खासगी रुग्णालयामध्ये त्यांना नेण्यात आले. तिथे उपचारादरम्यान त्यांचा मृत्यू झाला. त्यांच्या मृत्यूनंतर डॉक्टर मुलगा आणि नातू यांचे नमुने तपासण्यात आले आणि ते पॉझिटिव्ह आले. असे असतानाही रुग्णालयात न राहता हे दोघेही ठाकूरद्वार येथील घरी परतले.

मृतदेहामुळे प्रादुर्भावाचा धोका

करोनामुळे मृत्युमुखी पडलेल्या व्यक्तीमुळे इतर कुणाला संसर्ग होऊ नये यासाठी त्यावर प्रक्रिया करून अंत्यसंस्कार केले जातात. मात्र या डॉक्टरच्या नातवाच्या मित्रांनी मृत डॉक्टरचे चर्नी रोड नजीक दफनभूमीत दफन केले. हा अंत्यविधी शासकीय प्रक्रियेनुसार करण्यात आला नसल्याचा संशय पोलिसांना असून यामुळे प्रादुर्भाव होण्याचा धोका आहे. यासंदर्भात पालिका आणि आरोग्य विभागाशी बोलून माहिती घेतली जात असून त्यानुसार पुढील कारवाई केली जाईल, असे एका अधिकाऱ्याने सांगितले.