मुंबईतील ९६% रस्ते खराब स्थितीत

मुंबई: मुंबईतील तब्बल ९६ टक्के रस्ते खराब स्थितीत असल्याचे तपासणीअंती स्पष्ट झाले आहे. रस्ते पाहणीबाबतच्या समितीने केलेल्या पाहणीनंतर बाइक आणि कार चालकांच्या दाव्यात तथ्य असल्याचे समोर आले आहे. विशेष म्हणजे हे रस्ते कंत्रादाराने हमी दिलेल्या कालावधीपूर्वीच रस्त्यांची ही स्थिती झाली असल्याचे स्पष्ट झाले आहे.

रस्त्याची खराब स्थिती लक्षात आल्यानंतर मुंबई महानगर पालिकेने या रस्त्यांच्या स्थितीला जबाबदार असणाऱ्या २६ कंत्राटदारांना नोटीसा बजावण्याचा निर्णय घेतला आहे. ज्या रस्त्यांची स्थिती खराब आहे, अशा रस्त्यांमध्ये एस. व्ही. रोडवर वांद्रे ते अंधेरी आणि फोर्टमधील कुपरेजजवळील रस्त्यांचा समावेश आहे.

मुंबईकरांकडून पावसाळ्यात खराब रस्त्यांबाबत अनेक तक्रारी आल्यानंतर मुंबई महानगर पालिकेने मुंबईतील विविध भागांमधील १८४ रस्त्यांची तपासणी करण्याचा निर्णय घेतला. या रस्त्याला जबाबदार असणाऱ्या कंत्राटदारांनी या रस्त्यांची योग्य ती काळजी घेतली की नाही याबाबतही तपासणी करण्याचे आदेश महापालिकेने दिले. निविदांमधील अटी आणि नियमांनुसार, कंत्राटदाराने रस्ते बांधणीनंतर तीन वर्षांपर्यंत काळजी घेणे बंधनकारक आहे. या नियमांनुसार कंत्राटदार वागले किंवा कसे, याबाबतही महापालिका तपासणी करणार आहे.

रस्त्यांची स्थिती जाणून घेण्यासाठी केलेल्या आठवडाभरानंतरच्या तपासणीनंतर १८४ रस्त्यांपैकी तब्बल १७७ रस्त्यांची स्थिती खराब असल्याचे स्पष्ट झाले आहे.