इथे आहे पाळीव प्राण्यांसाठी खास टॅक्सी सेवा

मटा ऑनलाइन वृत्त। मुंबई

मुंबई शहरात एका नव्या प्रकारची टॅक्सी सेवा सुरु होणे ही काही आश्चर्याची गोष्ट नव्हे. मात्र ही सुरू झालेली नवी टॅक्सीसेवा आश्चर्यचकित करणारी आहे हे नक्की. कारण ही सेवा लोकांसाठी नसून ही सेवा फक्त पाळीव प्राण्यांसाठी आहे. डोंबिवलीच्या लक्ष्मी अग्रवाल (वय २६ वर्षे ) यांनी प्राण्यांसाठी ही खास सेवा सुरु केली आहे. सार्वजनिक टॅक्सी किंवा रिक्षामधून पाळीव प्राण्यांना नेण्यास अडचण होते. ही अडचण दूर व्हावी यासाठी त्यांनी ही टॅक्सी सेवा सुरु केली.

याआधी लक्ष्मी अग्रवाल टूरिस्ट टॅक्सी चालवत होत्या. आपले कर्तव्य बजावत असताना पाळीव प्राण्यांना देखील टॅक्सीची गरज आहे हे त्यांच्या लक्षात आले. आता लक्ष्मी यांच्याजवळ दोन टॅक्सी आहेत. लक्ष्मीने सांगितले की या टॅक्सीचे भाडे २५ रुपये प्रति मीटर आहे आणि याची बुकिंग २४ तास आधी करावी लागते. शहरातील पाळीव प्राण्यांना नेण्याच्या व आणण्याच्या कामाशिवाय जवळपासच्या शहरांपर्यंतही बुकिंग केली जाते. लक्ष्मी सोशल मीडियावरून आपल्या टॅक्सीची माहिती लोकांना कळवत असतात.

आपल्या या टॅक्सी सेवेला लोकांचा चांगला प्रतिसाद मिळत असल्याते लक्ष्मी सांगतात. आपल्या सेवेबाबत चांगल्या प्रतिक्रियाही मिळत असल्याचेही त्या सांगतात. आधी ज्या प्राणीमित्रांना पाळीव प्राण्यांची ने-आण करण्यास त्रास व्हायचा आता त्यांना ते सोईस्कर होत आहे. आता या टॅक्सीची मागणी वाढत आहे आणि लवकरच या टॅक्सींची संख्याही आपण वाढवणार वाढवण्याचेही त्या म्हणाल्या.