म. टा. प्रतिनिधी, मुंबई
शालेय विद्यार्थ्यांना नौदलाच्या ताफ्यातील विविध हेलिकॉप्टर बघण्याची संधी आज, मंगळवारी मिळणार आहे. ४ डिसेंबर या नौदल दिनाच्या निमित्ताने पश्चिम नौदल कमांडने हे आयोजन केले आहे.
नौदलाच्या ताफ्यात सी-किंग, चेतक, ध्रृव ही पाणबुडीविरोधी, संभाव्य हल्ल्याचा शोध घेणारी तसेच, बचावकार्यासाठी वापरली जाणारी हेलिकॉप्टर आहेत. मुंबईत या हेलिकॉप्टरांचा तळ कुलाबा परिसरातील 'आयएनएस शिक्रा' येथे आहे. शालेय विद्यार्थ्यांना ही हेलिकॉप्टर जवळून दाखविण्यासाठी नौदलाने विशेष कार्यक्रमाचे आयोजन केले आहे. त्यानुसार, विद्यार्थी शाळांच्या मार्फत दुपारी २ वाजतापासून 'आयएनस शिक्रा' तळात येऊ शकतील. विद्यार्थ्यांनी स्वत:चे ओळखपत्र सोबत बाळगणे आवश्यक आहे. नौदलाच्या हेलिकॉप्टरांच्या दररोज विविध फेऱ्या सुरू असतात. त्यादेखील विद्यार्थ्यांना या भेटीदरम्यान पाहता येणार आहेत.