मुंबईत रेसकोर्सवर मुलीचा विनयभंग

म. टा. खास प्रतिनिधी, मुंबई

महालक्ष्मी येथे रेसकोर्सवर चालण्यासाठी येणाऱ्या १६ वर्षीय मुलीचा एका तरुणाने विनयभंग केल्याची घटना नुकतीच घडली. याप्रकरणी ताडदेव पोलिसांनी राहुल परदेशी या फ्री लान्सर प्रशिक्षकाला अटक केली आहे.

सातरस्ता येथे राहणारी ही मुलगी नुकतीच दहावी उत्तीर्ण झाली आहे. ती गेल्या आठवड्यापासून दररोज चालण्यासाठी रेसकोर्सवर येते. काही दिवसांपासून पाठलाग केल्यानंतर राहुल याने काही ना काही कारणे सांगून तिच्याशी बोलण्यास सुरुवात केली. तू वजन कमी करण्यासाठी करीत असलेले व्यायामाचे प्रकार चुकीचे आहेत. तुझी चालण्याची पद्धतही चुकीचे असल्याचे सांगून राहुल याने प्रशिक्षण देण्याचा बहाणा केला. त्याच बहाण्याने त्याने या मुलीच्या अंगाला अनेक ठिकाणी स्पर्श केला. तिने हा प्रकार घरी सांगितल्यावर कुटुंबीयांनी ताडदेव पोलिस ठाण्यात तक्रार केली. वरिष्ठ पोलिस निरीक्षक फिरोझ बागवान यांच्या मार्गदर्शनाखाली उपनिरीक्षक अभिजित टेकवडे आणि बजरंग जगताप यांच्या पथकाने दोन दिवसांच्या सलग तपासानंतर राहुल याला शोधून काढले. राहुल हा फ्री लान्सर प्रशिक्षक असून तो या ठिकाणी येणाऱ्यांना व्यायामाचे धडे देत असल्याचे समोर आले आहे.