विद्यापीठ चालवताय की रेस्टॉरंट?- आदित्य

मटा ऑनलाइन वृत्त । मुंबई

पुणे विद्यापीठाचे 'योगमहर्षी राष्ट्रीय कीर्तनकार रामचंद्र गोपाळ शेलार ऊर्फ शेलारमामा सुवर्णपदक' केवळ शाकाहारी आणि निर्व्यसनी विद्यार्थ्यालाच दिले जाईल, अशी अट घालणाऱ्या पुणे विद्यापीठावर युवा सेना प्रमुख आदित्य ठाकरे यांनी टीकास्त्र सोडलं आहे.

'हे फर्मान मागे घ्या, अभ्यास आणि अभ्यास पडताळणीवर लक्ष द्या. कोणी काय खावं यापेक्षा, त्यांना अभ्यासानंतर नोकरी, रोजीरोटी कशी मिळेल यात लक्ष द्या. तुम्ही विद्यापीठ चालवताय की रेस्टॉरंट काढलंय?', अशी चपराक त्यांनी ट्विटरवरून लगावली आहे.

सावित्रीबाई फुले पुणे विद्यापीठाशी संलग्न महाविद्यालयांतील विज्ञान विद्याशाखा आणि विज्ञानेतर विद्याशाखेतील पदव्युत्तर अभ्यासक्रम पूर्ण केलेल्या विद्यार्थ्यांना दरवर्षी 'शेलारमामा सुवर्णपदक' देण्यात येते. विद्यापीठाच्या संकेतस्थळावर यासंबंधी पत्रक प्रसिद्ध करण्यात आले आहे. त्यात देण्यात आलेल्या अनेक अटींपैकी एक अट वादग्रस्त ठरली आहे. केवळ शाकाहारी आणि निर्व्यसनी विद्यार्थ्यालाच हे सुवर्णपदक दिलं जाईल, या अटीवर अनेकांनी आक्षेप घेतलाय. आदित्य ठाकरे यांनीही त्यावरून पुणे विद्यापीठाला धारेवर धरलंय.

'निर्व्यसनी बरोबर. पण शाकाहारी?कोणी काय खावं हे कोणी का ठरवावं? शाकाहारी आणि सुवर्णपदक याचा काय संबंध? असले फर्मान काढणारे कोण आहेत, त्यांनाच सुवर्ण पदक देऊन पदमुक्त करा', असा आक्रमक पवित्रा आदित्य यांनी घेतलाय.

पुणे विद्यापीठाचा सावध पवित्रा

दरम्यान, 'निर्व्यसनी आणि शाकाहारी' या अटीवर बरीच टीका झाल्यानंतर पुणे विद्यापीठानं सावध पवित्रा घेतला आहे. कुणी काय खावं किंवा खाऊ नये, याबाबत आमचं काहीच म्हणणं नाही. तसा भेदभाव विद्यापीठ करत नाही. त्यामुळे या संदर्भात शेलारमामा सुवर्णपदकाच्या देणगीदारांशी चर्चा करून निर्णय घेऊ, असं विद्यापीठाने स्पष्ट केलंय.