गंभीर स्वरूपाच्या दोषांमुळे गर्भपाताला परवानगी

म. टा. विशेष प्रतिनिधी, मुंबई

२६ आठवड्यांची गर्भवती असलेल्या सोलापूरमधील २५ वर्षीय महिलेला गर्भातील गंभीर स्वरूपाच्या दोषांमुळे वैद्यकीयदृष्ट्या गर्भपात करण्याची परवानगी मुंबई उच्च न्यायालयाने गुरुवारी दिली. या महिलेने विलपार्ले येथील नानावटी सुपरस्पेशालिटी रुग्णालयात सोनोग्राफी व गर्भाचा एमआरआय केला असता, गर्भाच्या यकृताला सूज असल्याचे आणि त्यामुळे जीविताला धोका असल्याचे समोर आले होते. मात्र, कायद्यानुसार, २० आठवड्यांनंतरच्या गर्भाविषयी गर्भपात करता येत नाही. त्यामुळे या महिलेने अॅड. संग्राम चिनाप्पा यांच्यामार्फत रिट याचिका केली होती.

याविषयी सुट्टीकालीन न्यायालयातील न्या. शाहरुख काथावाला व न्या. अजय गडकरी यांच्या खंडपीठाने सुनावणी घेतल्यानंतर जे. जे. रुग्णालयाचे अधिष्ठाता यांच्या नेतृत्वाखालील मेडिकल बोर्डाला या महिलेची संपूर्ण वैद्यकीय तपासणी करून सीलबंद लिफाफ्यात अहवाल देण्याचे निर्देश दिले होते. या अहवालातही यकृताला हर्निया असल्याने गर्भात गंभीर दोष असून प्रसूती झाल्यास अर्भकाच्या जीविताला धोका असल्याचे स्पष्ट करण्यात आले. त्यामुळे खंडपीठाने त्याची गांभीर्याने दखल घेत या महिलेला आज, शुक्रवारी नानावटी रुग्णालयात वैद्यकीयदृष्ट्या गर्भपात करण्याची परवानगी दिली.