अबू जुंदाल दोषी

औरंगाबाद शस्त्रसाठा खटला

म. टा. प्रतिनिधी, मुंबई

गुजरात दंगलीचा सूड घेण्यासाठी गुजरातचे तत्कालीन मुख्यमंत्री नरेंद्र मोदी व हिंदू नेते प्रवीण तोगडिया यांच्या हत्येचा कट रचल्याचा दावा ग्राह्य धरत मोक्का न्यायालयाने औरंगाबादमध्ये शस्त्रसाठा गोळा करणारा ‘लष्कर ए तोयबा’चा दहशतवादी सय्यद जबाउद्दीन अन्सारी ऊर्फ अबू जुंदाल व अन्य ११ आरोपींना गुरुवारी दोषी जाहीर केले. खटल्यातील आठ आरोपींची न्यायालयाने निर्दोष मुक्तता केली आहे. मात्र जुंदालसह सर्व २२ आरोपींचा ‘मोक्का’ काढण्यात आला आहे.

या खटल्याचा निकाल तब्बल दहा वर्षांनी गुरुवारी लागला. दोषींच्या शिक्षेवर सरकारी वकील व आरोपींच्या वकिलांचा युक्तिवाद ऐकल्यावर न्या. श्रीकांत अणेकर आज, शुक्रवारी शिक्षा सुनावण्याची शक्यता आहे. मोदी आणि तोगडिया यांच्या हत्येचा कट या आरोपींनी रचला होता आणि जनतेत दहशत निर्माण करण्याचा त्यांचा हेतू होता, हे तपास यंत्रणेचे म्हणणे न्यायालयाने ग्राह्य धरले आहे.
औरंगाबाद शस्त्रसाठा खटल्यातील दोन आरोपींवर स्वतंत्र खटले चालणार आहेत. फरारी शेख अब्दुल नईम ऊर्फ नय्यू ऊफ समीर याच्यावर आणि मेहम्मूद सय्यद ऊर्फ मुन्ना मुस्तफा हा माफीचा साक्षीदार फुटल्याने त्याच्याविरुद्ध स्वतंत्रपणे खटला चालणार आहे.

या खटल्याच्या काळात सरकार पक्षाचे शंभर व बचाव पक्षाचे १६ साक्षीदार तपासण्यात आले. एका आरोपीने ‘मोक्का’ कायद्यातील काही तरतुदींच्या घटनात्मक वैधतेला आव्हान दिल्याने सर्वोच्च न्यायालयाने खटल्याच्या सुनावणीला स्थगिती दिली होती. ती स्थगिती २००९मध्ये उठविण्यात आली होती. अबू जुंदाल हाच मोटार चालवत होता आणि तो पोलिसांच्या तावडीतून निसटला होता. मात्र पोलिसांनी आमीर शकील अहमद, मोहम्मद जुबेर सय्यद अन्वर आणि अब्दुल अजीम अब्दुल जमील शेख ऊर्फ राजा या तिघांना अटक केली होती. ते तिघे टाटा सुमोमध्ये होते. बीडचा रहिवासी असलेल्या जुंदालने मालेगावला जाऊन तेथून तो बांगलादेश व पाकिस्तानला पळाला होता. मात्र त्याला २०१२ मध्ये सौदी अरेबियातून प्रत्यार्पित करण्यात आले होते.

दोषी आरोपी

अबू जुंदाल, मोहम्मद मुजफ्फर मोहम्मद तन्वीर, जावेद अहमद अब्दुल मजिद, मुश्ताक अहमद मोहम्मद इसाक शेख, अफजल खान नबी खान, डॉ. मोहम्मद शरीफ शबीर अहमद, बिलाल अहमद अब्दुल रझाक, सय्यद अकीफ सय्यद जफ्रुद्दीन, अफरोज खान शाहीद खान पठाण, फैजल अतौर रेहमान शेख, मुस्तफा, अस्लम काश्मिरी

निर्दोष मुक्तता

मोहम्मद जुबेर सय्यद अन्वर, अब्दुल अजिम, रियाज अहमद मोहम्मद रमझान, खातिब इम्रान अकील अहमद, शेख अहमद निसार, अब्दुल समद, मोहम्मद अकील मोहम्मद इस्माइल मोमीन, फिरोज ताजुद्दिन देशमुख