'माथेरानच्या राणी'ला एसी डबा

- डब्यात १६ आसने

- आकर्षक रचना

- ५०० रु. तिकीट?

म. टा. खास प्रतिनिधी, मुंबई

माथेरान मिनी ट्रेनमध्ये लवकरच एसी डब्यातून सैर करण्याची संधी मिळणार आहे. उन्हाळ्यात एसी डब्याची आवश्यकता लक्षात घेऊन मध्य रेल्वेने एसी डब्यासाठी पाठपुरावा केला होता. त्यानुसार खास डबा तयार झाला असून, या एसी प्रवासातील तिकीटदरांना मान्यता मिळताच ते सेवेत येतील, असे स्पष्ट करण्यात आले आहे.

माथेरानमधील पर्यटकांना मिनी ट्रेनचे प्रचंड आकर्षण आहे. मध्यंतरीच्या काळात रेल्वे रुळांच्या सुरक्षिततेचा प्रश्न निर्माण झाल्याने ही सेवा बंद करण्यात आली होती. ही खंडित सेवा सुरू होताच प्रवाशांचा ओघ पुन्हा वाढला आहे. माथेरानच्या मिनी ट्रेनमध्ये डब्यांची संख्या वाढवतानाच त्यात एक एसी डबाही असावा, यासाठी रेल्वेने आग्रही भूमिका घेतली होती. मध्य रेल्वेने या डब्यात दीड टन क्षमतेचे एसी बसवले आहेत. त्यासाठी ७५० केव्ही जनरेटरही जोडण्यात आला आहे. या डब्यात १६ आसने असतील. या डब्यांची रचना आकर्षक ठेवण्यावर भर देण्यात आला आहे. एसी प्रवासासाठी प्रत्येकी ५०० रु. तिकीट आकारण्याचा विचार सुरू आहे.