शिवशाही कंत्राटी केल्याने अपघात वाढले

म. टा. खास प्रतिनिधी, मुंबई

एसटी महामंडळाने शिवनेरीप्रमाणे शिवशाही बससेवेसाठी कंत्राटी पद्धतीचा अवलंब केला. पण गेल्या वर्षभरात राज्यभरात शिवशाही बसचे १६ अपघात झाल्याने चिंतेचे वातावरण पसरले आहे. प्रशिक्षणाचा अभाव असणारे चालकही अपघातास जबाबदार असल्याची चर्चा महामंडळात सुरू आहे.

खासगी बसवाहतूकदारांना स्पर्धा देण्यासाठी वातानुकूलित, किफायतशीर, आरामदायी सेवा देण्यासाठी शिवशाही बसचा पुरस्कार करण्यात आला. त्या पद्धतीने टप्प्याटप्प्याने बसेस सेवेत दाखल झाल्या आहेत. महत्त्वाच्या मार्गांवर शिवशाही बस चालवण्यात येत असून त्यास प्रतिसादही चांगला आहे.

अलिबागमध्ये नुकतेच शिवशाही आणि एसटीच्या साध्या बसमध्ये अपघात होउन ४० प्रवासी जखमी झाले होते. त्यात शिवशाही बसच्या चालकाने ओव्हरटेक करण्याच्या प्रयत्नात अपघात झाल्याचे सांगण्यात येते. ही बस कंत्राटी स्तरावर चालवली जात असून यापूर्वीही त्याच पद्धतीने चालवल्या जाणाऱ्या बस सेवेतील चालकांकडून अपघात झाल्याचे वरिष्ठ पातळीवर बोलले जाते.

एसटी महामंडळात एकूण ८९७ शिवशाही बस असून त्यापैकी स्वत:च्या मालकीच्या ४७९ आणि कंत्राटी स्तरावर ४१८ बस आहेत. या बसचे तिकीट इतर सेवांमानाने स्वस्त असल्याने या सेवांना चांगला प्रतिसाद आहे. कंत्राटी स्तरावर बसचा चालक हा कंत्राटदाराचा असून कंडक्टर महामंडळाच्या सेवेतील आहे.

पण या चालकांना योग्य प्रशिक्षण व पुरेशी विश्रांती मिळत नसल्याचाही दावा केला जातो. त्यासाठी कंत्राटदार जबाबदार असल्यास त्यांच्यावर कारवाई करण्याची मागणीही केली जात आहे. शिवनेरी बसच्या अपघातांची संख्या तुलनेने कमी असल्याकडेही अधिकाऱ्यांनी लक्ष वेधले आहे.