म. टा. प्रतिनिधी, मुंबई
सुप्रसिद्ध बॉलिवूड अभिनेत्री सोनाली बेंद्रे हिला कॅन्सर झाल्याचे निदान झाले आहे. ट्विटरच्या माध्यमातून तिने स्वत: ही माहिती आपल्या चाहत्यांना मंगळवारी सकाळी दिली. सोनालीवर सध्या न्यूयॉर्कमध्ये उपचार सुरू आहेत. सोनाली 'इंडियाज बेस्ट ड्रामेबाज' या रिअॅलिटी शोमध्ये परीक्षकाची जबाबदारी सांभाळत होती. मात्र, वैयक्तिक कारण देत काही दिवसांपूर्वी तिने हा शो सोडला होता. 'सरफरोश', 'हम साथ साथ है' आणि 'लज्जा' यांसारख्या चित्रपटांमध्ये तिने दमदार भूमिका साकारली आहे.
सोनालीने ट्विटरवरील भावनिक पोस्टमध्ये लिहिले आहे की, 'कधी कधी काही गोष्टींची कुणकुण लागते आणि अनपेक्षितपणे आयुष्यात बदल होतो. मला हाय-ग्रेड कॅन्सर असल्याचे निदान झाले आहे. सतत वेदना जाणवत असल्याने काही चाचण्या केल्या असता, त्यातून कॅन्सरचे अनपेक्षित निदान झाले. माझे कुटुंबीय आणि जवळच्या मित्र-मैत्रिणींनी मला खूप साथ दिली. त्या सर्वांचे मी आभार मानते.' ४३ वर्षीय सोनाली बेंद्रे हिचा सिनेनिर्माता गोल्डी बहल यांच्याशी विवाह झाला असून त्यांना १३ वर्षांचा मुलगा आहे.
सोनालीने आपल्या पोस्टमध्ये असेही म्हटले आहे की, 'डॉक्टरांच्या सांगण्यानुसार, मी सध्या न्यूयॉर्कमध्ये उपचार घेत आहे. या मार्गातील प्रत्येक अडचणीला सामोरे जाण्यासाठी मी सज्ज आहे. गेल्या काही दिवसांपासून लोकांकडून मिळत असलेल्या प्रेमाचा मोठा आधार आहे. कुटुंबीय आणि मित्र-परिवार माझ्या पाठीशी खंबीर उभा असल्याने मी ही लढाई लढण्यास सज्ज आहे.' सोनाली न्यूयॉर्कला उपचारासाठी रवाना झाल्याने 'इंडियाज बेस्ट ड्रामेबाज'चे परीक्षण अभिनेत्री हुमा कुरेशी करणार आहे.
कॅन्सरचा विळखा
अभिनेता इरफान खान सध्या न्यूरोएंडोक्राइन ट्युमर या आजाराशी झगडत आहे. यापूर्वी २००० साली अभिनेत्री मुमताज हिला ब्रेस्ट कॅन्सरने ग्रासले होते. या आजारातून बाहेर यायला तिला बरीच वर्षे लागली होती. मॉडेल-अभिनेत्री लिसा रे हिला २००९ मध्ये प्लाज्मा सेल्सचा कॅन्सर झाला होता. तसेच 'बर्फी' सिनेमाचे दिग्दर्शक अनुराग बसू यांना २००४ साली रक्ताचा कॅन्सर झाला होता. २०१२मध्ये अभिनेत्री मनिषा कोइराला हिला गर्भाशयाचा कॅन्सर झाल्याचे निदान झाले होते. आजारातून बरे झाल्यानंतर तिने पुन्हा एकदा अभिनयाच्या क्षेत्रात पुनरागमन केले आहे.