सुमीत राघवनचा आदित्य ठाकरेंना खरमरीत टोला

मुंबई: शिवसेनेच्या विरोधामुळं गाजत असलेल्या मुंबईतील मेट्रो-३ प्रकल्पाला पाठिंबा दिल्यानंतर अभिनेता सुमीत राघवन यानं आता पुढचं पाऊल टाकलं आहे. सुमीतनं ट्विटरच्या माध्यमातून शिवसेनेचे युवा नेते आदित्य ठाकरे यांना मुंबईतील रस्त्यांच्या दुरावस्थेवरून सुनावलं आहे. सुमीतच्या या ट्विटची राजकीय व सांस्कृतिक वर्तुळात जोरदार चर्चा आहे.

केंद्रीय निवडणूक आयोगानं आज महाराष्ट्र विधानसभेच्या निवडणुकीची तारीख जाहीर केली. निवडणुकीची घोषणा होताच आदित्य ठाकरे यांनी एक ट्विट केलं आहे. 'निवडणुकीची घोषणा झालीय. लोकशाहीचा उत्सव सुरू झालाय. 'तुमचं सरकार, तुमचं भवितव्य घडवण्याचा अधिकार बजावण्याची वेळ आलीय. हीच ती नवा महाराष्ट्र घडवण्याची वेळ आहे,' असं आदित्य यांनी ट्टिवमध्ये म्हटलंय.
आदित्य यांच्या या 'नव्या महाराष्ट्रा'च्या ट्विटवर सुमीतनं अत्यंत बोचरी प्रतिक्रिया दिलीय. 'नवे रस्ते घडवलेत तरी नवा महाराष्ट्र घडेल,' असं त्यानं म्हटलंय. सोबत #येरेमाझ्यामागल्या असा हॅशटॅगही दिलाय. सुमीतच्या या टीकेला शिवसेना कसं प्रत्युत्तर देते, हे आता पाहावं लागणार आहे.
संबंधित बातमी: अमिताभनंतर सुमीत राघवनचाही मेट्रोला पाठिंबा