सुश्मिता सेनवर होणार दंडात्मक कारवाई?

मटा ऑनलाइन वृत्त। मुंबई

काही दिवसांपूर्वी बॉलिवूड अभिनेता शाहिद कपूर याच्या घरी डेंग्यू डासांच्या आळ्या सापडल्यानंतर आता प्रसिद्ध अभिनेत्री सुश्मिता सेन हिच्या खार येथील घरात डासांची उत्पत्तीस्थाने आढळून आली आहेत. या प्रकरणी सुश्मिता सेनला पालिकेने नोटीस बजावली असून तिच्यावर दंडात्मक कारवाई होण्याची शक्यता आहे.

सुश्मिता सेन खार येथे डॉ. बाबासाहेब आंबेडकर रोडवर असलेल्या सद्गुरू सुंदरी सोसायटीत सहाव्या मजल्यावर राहते. डासांच्या आळ्यांचा शोध घेण्यासाठी महापालिकेने राबवलेल्या मोहिमे अंतर्गत सद्गुरू सुंदरी इमारतीतील प्रत्येक घरात तपासणी करण्यात आली. सुश्मिता सेनने मात्र काही कारणांसाठी डास शोधकांना आपल्या घरात प्रवेश नाकारला होता. शेवटी गेल्या शुक्रवारी डास शोधकांनी तिच्या घराची पाहणी केली. डास शोधकांनी केलेल्या पाहणीत शोधकांनी सुश्मिताच्या घरात तीन ठिकाणी डासांची उत्पत्तीस्थाने आढळून आली. शोधकांनी ती तात्काळ नष्ट करून टाकली.

पालिकेने सुश्मिता सेनला या प्रकरणी कलम ३८१(ब) अनुसार नोटीस बजावली आहे. यानुसार सुश्मितावर दंडात्मक कारवाई होण्याची शक्यता निर्माण झाली आहे.