'ऐ दिल...' वादात मुख्यमंत्र्यांची मध्यस्थी

मटा ऑनलाइन वृत्त । मुंबई

मुख्यमंत्री देवेंद्र फडणवीस यांनी आज 'ऐ दिल है मुश्किल' वादावर तोडगा काढण्यासाठी मनसे अध्यक्ष राज ठाकरे आणि या चित्रपटाचे दिग्दर्शक करण जोहर यांच्याशी चर्चा केली. या बैठकीत सकारात्मक चर्चा झाली, असा दावा बैठकीनंतर दिग्दर्शक मुकेश भट यांनी केला आहे. दरम्यान, मुख्यमंत्री वा राज ठाकरे यांच्याकडून अद्यापि कोणतीही प्रतिक्रिया आलेली नाही.

मुख्यमंत्र्यांसोबत झालेल्या बैठकीत आम्ही प्रोड्युसर्स असोसिएशनच्या निर्णयाबाबत माहिती दिली. यापुढे कोणत्याही पाकिस्तानी कलाकाराला आम्ही चित्रपटात काम न देण्याचा निर्णय आम्ही घेतला आहे. तसेच 'ऐ दिल है मुश्किल चित्रपट' थिएटरमध्ये दाखवताना त्याआधी उरी हल्ल्यात शहीद झालेल्या जवानांना श्रद्धांजली वाहण्यात येईल. हा चित्रपट यशस्वी ठरो अथवा न ठरो चित्रपटाच्या कमाईचा काही भाग सैनिक कल्याण निधीला देण्यात येईल, असे आम्ही मुख्यमंत्र्यांना सांगितल्याचे मुकेश भट यांनी माध्यमांना सांगितले.

या बैठकीत खेळीमेळीच्या वातावरणात आणि सकारात्मक चर्चा झाली. आमचं म्हणणं सविस्तरपणे मांडलं. आम्ही सर्वात आधी भारतीय आहोत. देशभावना, जवानांच्या भावना आमच्यासाठी अन्य कोणत्याही गोष्टीपेक्षा मोठ्या आहेत, असे आम्ही बैठकीत स्पष्ट केल्याचेही भट यांनी नमूद केले.

दरम्यान, 'ऐ दिल है मुश्किल' चित्रपट दिवाळीच्या तोंडावर २८ ऑक्टोबर रोजी सर्वत्र प्रदर्शित होणार असून या चित्रपटापुढे उभी ठाकलेली 'मुश्किल' काहीशी 'आसान' झाल्याचे दिसत आहे.