'त्या' टि्वटवरून सुचित्रा कृष्णमूर्तीवर टीका

मटा ऑनलाइन वृत्त । मुंबई

प्रसिद्ध गायक सोनू निगम यांच्यापाठोपाठ प्रसिद्ध गायिका सुचित्रा कृष्णमूर्ती या सुद्धा 'अजान' संदर्भात केलेल्या टीकेवरून नेटकऱ्यांच्या टीकेचं लक्ष्य ठरल्या आहेत. सुचित्रा यांचं टि्वट येताच नेटकऱ्यांनी अत्यंत घाणेरड्या शब्दात त्यांच्यावर टीका करायला सुरूवात केली असून त्यांनीही या टीकेचा समाचार घेतला आहे.

‘पहाटे पावणेपाचला घरी आल्यावर अजानचा कर्कश्श आवाज ऐकावा लागला. अशा प्रकारे एखादा धर्म दुसऱ्यांवर लादणं यापेक्षा दुर्दैवी काही असू शकत नाही’, असं टि्वट सुचित्रा कृष्णमूर्ती यांनी केलंय. त्यावरून सोशल मीडियावर एकच खळबळ उडाली आहे. सुचित्राच्या या टि्वटवर एका युजर्सने 'पहाटे ब्रह्म मुहूर्तावर उठणे चांगलं असतं,' असा टोला लगावला. त्यावर सुचित्रा यांनीही या युजर्सची कानउघडणी करत 'मी ब्रह्म मुहूर्तावर आपोआप उठते. प्रार्थना करते, रियाज करते आणि योगाही करते. मला माझी कर्तव्य आणि देवाला आठवण्यासाठी लाऊडस्पीकरची गरज पडत नाही,' अशा शब्दात कान उपटले.
came home at 4.45 am 2 most aggressive/ ear shattering call of azaan. Nothing more lowlife & dumb than such extreme imposed religiousity — Suchitra (@suchitrak) July 23, 2017
तर दुसऱ्या एका युजर्सने सोनू निगमनेही अशाच प्रकारचं टि्वट केलं होतं, अशी आठवण तिला करून दिली. त्यालाही तिने उत्तर दिले आहे. 'सोनूच्या टि्वटनंतरही अजानची आवाज आणखी वाढली बहुतेक. त्यांनी ज्या ठिकाणी टि्वट केलं तिथूनच मी सुरूवात केली आहे,' अस उत्तर सुचित्राने दिलंय. पण काही युजर्सने तिच्यावर पातळी सोडून अत्यंत घाणेरड्या शब्दात टीका केली असून सुचित्राने मात्र या टिकेला संयमाने घेत त्याकडे दुर्लक्ष केल्याचं दिसून येतयं. काही युजर्सने सुचित्राच्या या टि्वटचं समर्थन केलंय. दुबई आणि मस्कतमध्ये अजानसाठी लाऊडस्पीकर लावल्या जात नाही. पण भारतात मात्र सर्रासपणे लाऊडस्पीकर लावल्या जातोय, असं सांगत काही युजर्सने तिची पाठराखण केली आहे. यापूर्वी सोनू निगम यांनीही अजानबाबत टि्वट केले होते. त्यामुळे वाद झाल्याने त्यांना टि्वटर अकाऊंट बंद करावे लागले होते.