शिक्षक आंदोलन चिघळले

आठ तास अटकेनंतर हमीपत्रावर सुटका

म. टा. प्रतिनिधी, मुंबई

विनाअनुदानित शाळांच्या अनुदानाच्या मागणीसाठी मुंबईत सुरू असलेले आंदोलन गुरुवारी चिघळले. या प्रश्नावर अर्थमंत्री सुधीर मुनगंटीवार यांच्या भेटीसाठी त्यांच्या बंगल्याजवळ आंदोलन करणाऱ्या २५ शिक्षकांना मलबार हिल पोलिसांनी अटक केली. ‘यापुढे आंदोलन करणार नाही’, असे हमीपत्र लिहून दिल्यानंतरच आठ तासांनंतर त्यांची सुटका झाली.

२० टक्के अनुदान जाहीर झालेल्या १६२८ शाळांना तातडीने अनुदान देण्याच्या मागणीसाठी ​राज्य विनाअनुदानित कृती समितीने मंगळवारी आझाद मैदानात आंदोलन सुरू केले आहे. त्याचवेळी, गुरुवारी सकाळी राज्य विनाअनुदानित कृती समितीचे मुंबई प्रदेशाध्यक्ष प्रशांत रेडीज यांच्या नेतृत्वाखाली २५ शिक्षकांनी अर्थमंत्री मुनगंटीवार यांच्या भेटीसाठी बंगल्याबाहेर आंदोलन केले. शाळांच्या अनुदानाचा प्रश्न १७ वर्षांपासून प्रलंबित आहे. तो आगामी हिवाळी अधिवेशनात मार्गी लागावा यासाठी रेडीज यांच्यासह काही शिक्षकांचा सकाळी अर्थमंत्री मुनगंटीवार यांची भेट घेण्याचा प्रयत्न होता. मात्र, भेट नाकारण्यात आल्याने शिक्षकांनी बंगल्याच्या प्रवेशद्वाराजवळच ‘राष्ट्रगीत’ आणि ‘वंदे मातरम’ म्हणत आंदोलन सुरू केले. त्यामुळे पोलिसांनी उपस्थित शिक्षकांना अटक केली. त्यानंतर शिक्षकांना पोलिसांनी नोटीस दिली व ‘यापुढे आंदोलन करणार नाही’, असे हमीपत्र लिहून घेतले. संध्याकाळी ५ वाजता त्यांची सुटका झाली. ‘वंदे मातरम आणि राष्ट्रगीत म्हटले म्हणून आम्हाला अटक झाली का, असा आम्हाला प्रश्न पडला आहे’, असे रेडीज म्हणाले. विनाअनुदानित शाळांचा प्रश्न लवकरात लवकर सुटावा यासाठी आमची धडपड सुरू आहे. पोलिसांनी अटकेची कारवाई केली असली तरीही यापुढेही आमचे आंदोलन सुरूच राहील’, असे ते पुढे म्हणाले.