मुंबई : हवेची गुणवत्ता मंगळवारी पुन्हा घसरली असून दिवसभरात नवी दिल्ली, पुणे आणि अहमदाबादपेक्षा मुंबईची हवा वाईट होती. ‘सफर’ या हवेची गुणवत्ता मोजणाऱ्या प्रणालीच्या माध्यमातून झालेल्या नोंदीनुसार नवी दिल्ली, पुणे आणि अहमदाबाद या तीनही शहरांमधील हवा मध्यम गुणवत्तेची होती तर मुंबईची हवा अतिवाईट नोंदवली गेली. मंगळवारी सर्वाधिक प्रदूषित शहरांच्या जागतिक क्रमवारीत मुंबई दुसऱ्या क्रमांकावर होती. तर कुवेत पहिल्या क्रमांकावर होते.
‘सफर’च्या नोंदीनुसार मुंबईच्या हवेचा गुणवत्ता निर्देशांक ३००हून अधिक होता. पुढील दोन दिवस मुंबईची हवा वाईट श्रेणीचा वरचा स्तर किंवा अतिवाईट श्रेणीचा खालचा स्तर यादरम्यान असण्याची शक्यता वर्तवण्यात आली आहे. दिवसभरात चेंबूर, वांद्रे कुर्ला संकुल आणि भांडुप येथे हवेची गुणवत्ता अतिवाईट नोंदली गेली. तर चर्चगेट, माझगाव, अंधेरी, अंधेरी, मालाड आणि बोरिवली येथे हवेची गुणवत्ता वाईट होती. या सर्व केंद्रांवर पीएम २.५चा स्तर अधिक घसरलेला होता. वांद्रे कुर्ला संकुल येथे नायट्रोजन डाय ऑक्साइडच्या निर्देशांकाची नोंदही वाईट श्रेणीमध्ये झाली. अंधेरी आणि माझगाव येथे नायट्रोजन डाय ऑक्साइडची गुणवत्ता श्रेणी मध्यम होती. सोमवारी मुंबईच्या कमाल तापमानात घट झाली. त्यानंतर मंगळवारी किमान तापमानही किंचित घसरले. त्यामुळे वातावरणात धुके होते. त्यातच वाऱ्यांचा वेग मंदावल्याने हवेत प्रदूषके साचून राहिली. मंगळवारी धुरक्याची जाणीवही अधिक प्रमाणात मुंबईकरांना झाली. पहाटेच्या किमान तापमानात घट, निरभ्र आकाश, समुद्रसपाटीपासून कमी उंची, वाढलेली सापेक्ष आर्द्रता, शांत वारा या कारणांमुळे धुक्याची निर्मिती होते, असे हवामान विभागाचे निवृत्त अधिकारी माणिकराव खुळे यांनी सांगितले.
‘सफर’च्या नोंदीनुसार मुंबईच्या हवेचा गुणवत्ता निर्देशांक ३००हून अधिक होता. पुढील दोन दिवस मुंबईची हवा वाईट श्रेणीचा वरचा स्तर किंवा अतिवाईट श्रेणीचा खालचा स्तर यादरम्यान असण्याची शक्यता वर्तवण्यात आली आहे. दिवसभरात चेंबूर, वांद्रे कुर्ला संकुल आणि भांडुप येथे हवेची गुणवत्ता अतिवाईट नोंदली गेली. तर चर्चगेट, माझगाव, अंधेरी, अंधेरी, मालाड आणि बोरिवली येथे हवेची गुणवत्ता वाईट होती. या सर्व केंद्रांवर पीएम २.५चा स्तर अधिक घसरलेला होता. वांद्रे कुर्ला संकुल येथे नायट्रोजन डाय ऑक्साइडच्या निर्देशांकाची नोंदही वाईट श्रेणीमध्ये झाली. अंधेरी आणि माझगाव येथे नायट्रोजन डाय ऑक्साइडची गुणवत्ता श्रेणी मध्यम होती. सोमवारी मुंबईच्या कमाल तापमानात घट झाली. त्यानंतर मंगळवारी किमान तापमानही किंचित घसरले. त्यामुळे वातावरणात धुके होते. त्यातच वाऱ्यांचा वेग मंदावल्याने हवेत प्रदूषके साचून राहिली. मंगळवारी धुरक्याची जाणीवही अधिक प्रमाणात मुंबईकरांना झाली. पहाटेच्या किमान तापमानात घट, निरभ्र आकाश, समुद्रसपाटीपासून कमी उंची, वाढलेली सापेक्ष आर्द्रता, शांत वारा या कारणांमुळे धुक्याची निर्मिती होते, असे हवामान विभागाचे निवृत्त अधिकारी माणिकराव खुळे यांनी सांगितले.