पॅरोलवरील दहशतवादी 'डॉ. बॉम्ब' मुंबईतून फरार

मुंबई:

अजमेर येथील बॉम्बस्फोट आणि देशभरातील अनेक बॉम्बस्फोटात सहभाग असलेला गुन्हेगार आग्रीपाडा पोलिस ठाण्यात हजेरीसाठी गुरुवारी आलाच नाही. डॉ. बॉम्ब उर्फ मोहम्मद जालीस अन्सारी (६८) असे या गुन्हेगाराचे नाव असून तो बेपत्ता झाल्याची तक्रार कुटुंबीयांनी केली आहे. जालीस याला शोधण्यासाठी पोलिस कामाला लागले आहेत.

अजमेर येथे १९९३ मध्ये झालेल्या बॉम्बस्फोट प्रकरणात सीबीआयने मुंबईच्या आग्रीपाडा येथे राहणाऱ्या जालीस अन्सारी याला अटक केली होती. चौकशीमध्ये त्याचा देशभरात झालेल्या इतर अनेक बॉम्बस्फोटात त्याचा सहभाग असल्याचे समोर आले. याप्रकरणी सर्वोच्च न्यायालयाने जालीस याला जन्मठेपेची शिक्षा सुनावली. सर्वोच्च न्यायालयाच्या निर्णयानंतर जालीस याला अजमेर येथील तुरुंगात ठेवण्यात आले होते. तुरुंगातूनच त्याने पॅरोलच्या सुट्टीसाठी अर्ज केला. या अर्जावर सर्वोच्च न्यायालयाने त्याला २१ दिवसांची सुट्टी मंजूर केली. सर्वोच्च न्यायालयाच्या आदेशानुसार जालीस याला अजमेर येथून मुंबईच्या आर्थर रोड तुरुंगात आणि तेथून २८ डिसेंबरला बाहेर सोडण्यात आले. त्यानंतर जालीस हा दररोज सकाळी १० ते १२ वाजताच्या सुमारास आग्रीपाडा पोलिस ठाण्यात येऊन हजेरी देत होता. मात्र, गुरुवारी तो हजेरीसाठी आलाच नाही. याबाबत चौकशी केली असता त्याच्या मुलाने जालीस सकाळपासून बेपत्ता असल्याचे सांगितले. त्याच्या तक्रार दाखल करीत पोलिसांनी त्याचा शोध सुरू केला आहे. पॅरोलची मुदत उद्या संपत असल्याने जालीस गायब झाला असावा, असाही संशय व्यक्त केला जात आहे.