अलिबाग, मुरुडमधील बंगले पाडणार

बंगले किती?

अलिबाग - २१२

मुरुड - १५१

मालक कोण?

नीरव मोदी, मेहुल चोक्सी, राजकारणी, सिनेकलावंत

म. टा. विशेष प्रतिनिधी, मुंबई

पर्यावरण आणि सीआरझेड कायद्याचे उल्लंघन करून रायगड जिल्ह्यातील अलिबाग आणि मुरुड समुद्रकिनारी बांधण्यात आलेले अनधिकृत बंगले पाडण्याचे आदेश राज्य सरकारने मंगळवारी दिले. या किनाऱ्यांवर बँक घोटाळा करून परदेशी पळालेला नीरव मोदी आणि मेहुल चोक्सी यांच्यासह मुंबईतील अनेक उच्चभ्रूंचे बंगले आहेत. काही राजकारण्यांसह सिनेकलाकारांनीही येथे अनधिकृत बंगले बांधले असून, ते पाडण्याचे आदेश राज्य सरकारने दिले आहेत.

रायगड जिल्ह्यातील किनाऱ्यांवरील जागा मुंबईतील उच्चभ्रूंनी खरेदी केल्या आहेत. यात नीरव मोदी, मेहुल चोक्सी यांच्याप्रमाणेच राजकारण्यांचाही समावेश आहे. या नेत्यांनी दुसऱ्यांच्या नावावर येथे बंगले उभारले आहेत. त्यासाठी पर्यावरण आणि सीआरझेड कायद्याचे सर्रास उल्लंघन करण्यात आले. मात्र बड्या नावांमुळे याकडे सरकारी यंत्रणांचे जाणीवपूर्वक दुर्लक्ष होत होते. अखेरीस याविरोधात मुंबई उच्च न्यायालयात दाद मागण्यात आली. न्यायालयाने पर्यावरण आणि सीआरझेड कायद्याचे उल्लंघन करून बांधलेले हे बंगले पाडण्याचे आदेश दिले. तसेच संबंधित अधिकाऱ्यांनाही धारेवर धरले होते.

न्यायालयाच्या आदेशानंतर मंगळवारी मंत्रालयात पर्यावरणमंत्री रामदास कदम यांनी अधिकाऱ्यांची बैठक घेतली. पर्यावरण विभागाच्या अधिकाऱ्यांसह रायगडचे जिल्हाधिकारी त्यास उपस्थित होते. यावेळी कदम यांनी, न्यायालयाच्या आदेशानुसार अलिबाग आणि मुरुड समुद्र किनाऱ्यांवरील हे अनधिकृत बंगले तत्काळ पाडण्यात यावेत, असा आदेश देतानाच, यासंदर्भातील अहवाल राज्य सरकारला सादर करावा, असेही स्पष्ट केले. मुंबईतील उच्चभ्रूंनी अलिबागच्या किनाऱ्यांवर २१२ तर, मुरुडच्या किनारी १५१ बेकायदा बंगले बांधले आहेत. आता हे बंगले पाडण्याची कारवाई रायगडचे जिल्हाधिकारी लवकरच सुरू करणार आहेत.