गणेशोत्सवासाठी कोकणात जाणाऱ्या भाविकांच्या सुविधेसाठी एसटी महामंडळाने यंदा २,२२५ जादा बसची व्यवस्था केली आहे. या बसचा कोकणाच्या दिशेने प्रवास सुरू झाला असून टप्प्याटप्प्याने वेगवेगळ्या आगारातून बस रवाना होत आहेत. त्याची सुरुवात मंगळवारी दादर येथील सेनापती बापट मार्गावरून झाली. परिवहन मंत्री आणि एसटी महामंडळाचे अध्यक्ष दिवाकर रावते यांनी कोकणात जाणाऱ्या प्रवाशांना गुलाबपुष्प देऊन शुभेच्छा दिल्या. यावेळी महामंडळाचे उपमहाव्यवस्थापक राहुल तोरो, विभाग नियंत्रक शैलेश चव्हाण यांच्यासह अधिकारी, पर्यवेक्षक, कर्मचारी उपस्थित होते. दादरपाठोपाठ लोअर परळ, कुर्ला, ठाणे आदी आगारातूनही बस रवाना होतील. यंदा सोडण्यात आलेल्या सर्वच्या सर्व जादा बसचे आरक्षण फुल्ल झाले आहे. गणेशोत्सवासाठी जाण्यासाठी आणि पुन्हा मुंबईत परतणाऱ्या प्रवाशांच्या सुविधेसाठी या गाड्यांचे नियोजन करण्यात आले आहे. दरवर्षी महामंडळातर्फे गणेशोत्सवात जादा बस पुरवण्यात येतात.
सारे प्रवासी एसटीचे!
गणेशोत्सवासाठी कोकणात जाणाऱ्या भाविकांच्या सुविधेसाठी एसटी महामंडळाने यंदा २,२२५ जादा बसची व्यवस्था केली आहे...
Maharashtra Times 12 Sep 2018, 4:00 am