प्रत्येक महिलेत सीतेचा अंश

‘सीता- वॉरियर ऑफ मिथिला’ पुस्तकाचे प्रकाशन

म. टा. खास प्रतिनिधी, मुंबई

‘सीता ही अबला नाही. तिने लढा दिला आहे. स्वतःवर विश्वास ठेवून लढणाऱ्या आजच्या काळातील प्रत्येक महिलेमध्ये सीतेचा अंश आहे. आपण ही सबलता साजरी करायला हवी, असे गौरवोद्गार ख्यातनाम लेखक अमीश त्रिपाठी यांनी काढले. ‘सीता वॉरियर ऑफ मिथिला’ या रामचंद्र श्रृंखलेतील दुसऱ्या पुस्तकांच्या प्रकाशनाच्या वेळी ‘महाराष्ट्र टाइम्स’शी खास संवाद साधताना त्यांनी ही भावना व्यक्त केली.

‘सीता- वॉरियर ऑफ मिथिला’ या पुस्तकाचे प्रकाशन गोरेगाव येथील ओबेरॉय मॉलमध्ये चित्रपट दिग्दर्शक सुभाष घई यांच्या हस्ते अमीश यांच्या असंख्य चाहत्यांच्या उपस्थितीत करण्यात आले. ‘रामचंद्र’ या श्रृंखलेतील हे दुसरे पुस्तक दोन वर्षांच्या कालावधीनंतर आले आहे. या पुस्तकात सीतेच्या दृष्टिकोनातून रामायणाचा प्रवास उलगडण्यात आला आहे. पाच पुस्तकांच्या या श्रृंखलेतील पुढील पुस्तक रावणाचा आढावा घेणारे आहे. या पुस्तकामध्येही रावण केवळ नकारात्मक दृष्टीने रेखाटण्यात आला नसून त्यामध्ये रावणाच्या चांगल्या गुणांचाही आढावा घेण्यात आला आहे. हे पुस्तक पुढील वर्षी प्रकाशित होईल.

या पुस्तक प्रकाशनासाठी तरुणांनी मोठी गर्दी केली होती. ‘शिवा ट्रायलॉजी’ आणि ‘सायान ऑफ इक्ष्वाकू’ या पुस्तकांच्या निमित्ताने तरुण पिढी पौराणिक कथांशी आणि त्याकडे पाहण्याच्या विविध दृष्टीकोनांशी जोडली गेल्याचे यातून समोर आले. या निमित्ताने मुखपृष्ठ रेखाटन स्पर्धेतील विजेत्यांना त्यांनी केलेल्या रेखाटनाचे मुखपृष्ठ असलेले पुस्तक पारितोषिक म्हणून देण्यात आले.

शिवा ट्रायलॉजीवर चित्रपट

शिवा ट्रायलॉजीवरील चित्रपटाची अमीश यांचे चाहते आतुरतेने वाट पाहत आहेत. हॉलिवूडने याचे हक्क घेतल्यालाही बराच काळ उलटून गेला आहे. मात्र येत्या एक ते दोन महिन्यांच्या कालावधीत या चित्रपटाची घोषणा करण्यात येईल, असा दिलासा चाहत्यांना देण्यात आला. या चित्रपटासोबतच रामचंद्र श्रृंखलेवर आधारित चित्रपटाविषयीही चर्चा सुरू असल्याचे अमीश यांनी यावेळी सांगितले.