अमित शहांचं बाळासाहेबांना अभिवादन

मटा ऑनलाइन वृत्त । मुंबई

राष्ट्रपतिपदाच्या निवडणुकीच्या पार्श्वभूमीवर मुंबई दौऱ्यावर आलेले भाजपचे राष्ट्रीय अध्यक्ष अमित शहा यांनी पहिल्याच चेंडूवर षटकार ठोकून आपले इरादे स्पष्ट केले आहेत. मुंबईत आल्या-आल्याच शहा यांनी थेट शिवाजी पार्कवर जाऊन शिवसेनाप्रमुख दिवंगत बाळासाहेब ठाकरे यांच्या स्मृतिस्थळाचं दर्शन घेतलं आणि त्यांना आदरांजली वाहिली. पार्कातील या 'खेळी'नं त्यांनी शिवसैनिकांना खिशात टाकलं आहे.

केंद्रातील आणि राज्यातील सत्तेत एकत्र असले, तरी भाजप आणि शिवसेनेमध्ये मतभेदांची मोठी दरी आहे. ती दिवसेंदिवस वाढतच चाललीय. एकमेकांना इशारे दिल्याशिवाय दोन्ही पक्षाच्या नेत्यांचा दिवसही पूर्ण होत नाही, असं चित्र काही काळापासून दिसतंय. शेतकरी संपावरून हा तणाव अधिकच वाढला आहे. राजकीय भूकंप आणि 'मध्यावधी'ची हवा वाहू लागली आहे. त्याचवेळी केंद्रात राष्ट्रपतिपदाच्या निवडणुकीची मोर्चेबांधणी सुरू झालीय.

या पार्श्वभूमीवर, अमित शहा तीन दिवसांसाठी मुंबईत आल्यानं या दौऱ्याकडे राजकीय वर्तुळाचं बारीक लक्ष आहे. यावेळी ते 'मातोश्री'वर जाऊन शिवसेना पक्षप्रमुख उद्धव ठाकरे यांचीही भेट घेणार आहेत. या भेटीनंतरच 'मध्यावधी'चं चित्र स्पष्ट होऊ शकेल, असं जाणकारांना वाटतंय. त्यामुळे सगळ्यांचेच कान टवकारलेत.

असं असताना, शिवसेनेशी वाद नव्हे तर संवाद साधण्याच्या हेतूनेच आपण आलो आहेत, असे संकेत अमित शहा यांनी दिलेत. शिवसेनेचं दैवत असलेल्या बाळासाहेबांना वंदन करून त्यांनी शिवसैनिकांना सुखद धक्का दिला आहे. त्यामुळे त्यांच्याबद्दलची तीव्र नाराजी आपोआपच कमी होऊ शकते. त्याचे सकारात्मक पडसाद उद्धव यांच्यासोबतच्या बैठकीतही उमटू शकतात.

मुंबईत येताच शिवाजी पार्क गाठून शहांनी सुरुवात तर दणक्यात केलीय. आता शेवट गोड होतो का, हे पाहावं लागेल.