amitabh Bachchan : अमिताभ यांच्या बंगल्यांचं सॅनिटायझेशन; कर्मचाऱ्यांचीही करोना टेस्ट

मुंबई: महानायक अमिताभ बच्चन यांच्यासह अभिषेक बच्चनलाही करोनाची लागण झाल्याने आता अमिताभ यांचे तिन्ही बंगले सॅनिटाइज करण्यात येणार आहेत. तसेच त्यांच्या बंगल्यातील सर्व कर्मचाऱ्यांची करोना चाचणीही करण्यात येणार आहे. स्वत: अभिषेक यांनी ट्विटरवरून ही माहिती दिली आहे.

अमिताभ बच्चन आणि अभिषेक यांना ताप आल्यामुळे त्यांची अँटिजेन चाचणी करण्यात आली आहे. यावेळी या दोघांनाही करोनाची लागण झाल्याचं निदान झालं. त्यानंतर दोघांनाही नानावटी रुग्णालयात उपचारासाठी दाखल करण्यात आलं. अमिताभ आणि अभिषेक या दोघांनीही ट्विट करून त्यांना करोना झाल्याची माहिती दिली. अमिताभ आणि अभिषेक यांना करोना झाला असला तरी जया बच्चन, ऐश्वर्या बच्चन-राय आणि आराध्या बच्चन यांचा करोनाचा रिपोर्ट निगेटिव्ह आला आहे. मात्र, खबरदारीचा उपाय म्हणून अमिताभ यांचे प्रतिक्षा, जलसा आणि जनक हे तिन्ही बंगले सॅनिटाइज केले जाणार आहेत. तसेच या तिन्ही बंगल्यातील सर्व कर्मचाऱ्यांचीही करोना चाचणी करण्यात येणार असल्याचं सूत्रांनी सांगितलं. तसेच अमिताभ आणि अभिषेक यांची आणखी एक चाचणी करण्यात येणार आहे.

अमिताभ काय म्हणाले होते...

अमिताभ यांनी त्यांना करोना झाल्याची माहिती ट्विट करून दिली होती. 'माझी करोना चाचणी पॉझिटिव्ह आली आहे. मला रुग्णालयात दाखल करण्यात आले आहे. रुग्णालयाने संबंधित यंत्रणांना याबाबत कळवलं आहे. घरातील अन्य सदस्य आणि स्टाफचे स्वॅबही तपासणीसाठी घेण्यात आले आहेत. त्यांचा करोना चाचणी अहवाल अजून आलेला नाही. त्याची प्रतीक्षा आहे', असे नमूद करतानाच अमिताभ यांनी संपर्कातील अन्य व्यक्तींनाही आवाहन केलं होतं. गेल्या दहा दिवसांत माझ्या संपर्कात आलेल्या सर्वांनी कृपया करोना चाचणी करून घ्यावी, अशी विनंती अमिताभ यांनी केली होती.


अमिताभ बच्चन यांना करोना; मुंबईतील नानावटी रुग्णालयात दाखल

अभिषेक यांनीही केलं होतं ट्विट...

अमिताभ यांच्यापाठोपाठ अभिषेक यांनीही ट्विट करून त्यांनाही करोना झाल्याची माहिती दिली होती. मला आणि माझ्या वडिलांना करोनाची लागण झाली आहे. दोघांमध्येही करोनाची सौम्य लक्षणे जाणवली होती. त्यामुळे आम्ही रुग्णालयात दाखल झालो आहोत. आमच्या कुटुंबीयांची आणि कर्मचाऱ्यांची करोना चाचणी करण्याबाबत संबंधित यंत्रणांना सांगितलं आहे. आमची प्रकृती चांगली आहे. काळजी करू नये, असं अभिषेक यांनी म्हटलं होतं.


अमिताभ बच्चन यांना करोना; मुंबईतील नानावटी रुग्णालयात दाखल

रेखाचा बंगला सील, गार्ड निघाला करोना पॉझिटिव्ह