अमृता फडणवीसांचा चाहत्यांसाठी खास प्रश्न; अचूक उत्तर द्या आणि....

मुंबई : भाजप नेते देवेंद्र फडणवीस यांच्या पत्नी व गायिका अमृता फडणवीस या आपल्या सोशल मीडियावरील पोस्टमुळे अनेकदा चर्चेत असतात. कधी आक्रमक राजकीय टिपण्णीमुळे तर कधी फिरकी घेण्याच्या हटके स्टाइलमुळे त्यांच्या पोस्टची चर्चा होत असते. अशातच अमृता फडणवीस यांनी आज एक ट्वीट केलं असून चाहत्यांना प्रश्न विचारत उत्तर देण्याचं आवाहन केलं आहे.

अमृता फडणवीस यांनी रिकाम्या जागा भरा, असं म्हणत चाहत्यांना एक प्रश्न विचारला असून उत्तरासाठी तीन पर्यायही दिले आहेत. आज मी....काय करणार आहे, या प्रश्नाचं अचूक उत्तर दिल्यास एक लाईक मिळेल, असं त्यांनी आपल्या ट्वीटमध्ये म्हटलं आहे.

तीन पर्याय कोणते?

१. मी करोनाबाधित आढळले आहे, २. मी आज एक दु:खी प्रेम गीत लिहिणार आहे, ३. पावसाळ्यापूर्वी मुंबईतील रस्त्यांची पाहणी करण्याचा बेत आखत आहे - असे तीन पर्याय अमृता फडणवीस यांनी दिले आहेत.



दरम्यान, अमृता फडणवीस यांनी उत्तर देण्याचं आवाहन करताच चाहत्यांकडूनही वेगवेगळे अंदाज बांधण्यात येत असून अमृता यांनी केलेल्या ट्वीटखाली प्रतिक्रियांचा पाऊस पडत आहे. या पार्श्वभूमीवर अमृता फडणवीस या काही वेळानंतर पुन्हा एकदा ट्वीट करून आज नेमकं काय करणार आहेत, याबाबत खुलासा करण्याची शक्यता आहे.