अमृता म्हणाल्या, देवेंद्र फडणवीस नेहमी खरं बोलतात

मुंबई: 'अर्थसंकल्प सोप्या भाषेत' या पुस्तकाच्या प्रकाशन सोहळ्यात माजी मुख्यमंत्री आणि विधानसभेचे विरोधी पक्षनेते देवेंद्र फडणवीस यांनी पत्नी अमृता फडणवीस यांच्या पगाराबाबत केलेल्या वक्तव्यावर आता स्वतः अमृता यांनी प्रतिक्रिया दिली आहे. देवेंद्र यांनी केलेलं वक्तव्य खरं आहे आणि ते नेहमीच खरं बोलतात, असं त्या म्हणाल्या.

माझ्यापेक्षा बायकोचा पगार जास्त: फडणवीस

पैशांचे सोंग न करता राज्याला प्रगतीकडे नेण्याचा संकल्प: मुख्यमंत्री



माजी मुख्यमंत्री आणि भाजप नेते देवेंद्र फडणवीस लिखित 'अर्थसंकल्प सोप्या भाषेत' हे पुस्तक नुकतेच प्रकाशित झाले. या पुस्तकाच्या प्रकाशन सोहळ्याला मुख्यमंत्री उद्धव ठाकरे, उपमुख्यमंत्री अजित पवार आदींसह राज्यातील दिग्गज नेते उपस्थित होते. या सोहळ्यात राजकीय नेत्यांची शाब्दिक फटकारे सगळ्यांनाच अनुभवायला मिळाले. यावेळी देवेंद्र फडणवीस यांनी पुस्तक लिहिण्यामागचा उद्देश आपल्या भाषणातून स्पष्ट केला. उत्पन्न आणि खर्चाबाबत त्यांनी विश्लेषण करताना पत्नी अमृता फडणवीस यांच्या पगाराचे उदाहरण दिले होते. 'आपल्याला मिळणारा पगार, पत्नीला मिळणारा पगार ही आपली आवक आहे. घरचा खर्च जावक आहे. माझ्यापेक्षा माझ्या पत्नीला मिळणारा पगार जास्त आहे. म्हणून तो मला लक्षात राहतो,' अशी मिश्किल टिप्पणी केली होती. फडणवीस यांच्या वक्तव्यावर आता पत्नी अमृता फडणवीस यांनी एका खासगी वृत्तवाहिनीशी बोलताना प्रतिक्रिया दिली आहे. देवेंद्र यांनी जे वक्तव्य केलं, ते अगदी खरं आहे. देवेंद्र हे नेहमीच खरं बोलतात. त्यांना बोलावच लागतं. माझा पगार आता त्यांच्यापेक्षा जास्त आहे. त्यांना त्याचा अभिमान वाटतो याचा मला गर्व आहे. पत्नीचा पगार आपल्यापेक्षा जास्त असल्याचं त्यांना अजिबात वाईट वाटत नाही, असं त्यांनी सांगितलं. एका खासगी कंपनीत उच्च पदावर नोकरी करणाऱ्या अमृता म्हणाल्या की, 'पुरुषांमध्ये जो इगो असतो तो देवेंद्रजींमध्ये नाहीय याचा मला आनंद आहे.'

राजकारण सोडून लेखक व्हा; फडणवीसांना अजितदादांचा सल्ला