अमूलचं दूध २ रुपयांनी महागलं

मुंबई:

अमूल कंपनीचं दूध मंगळवारपासून दोन रुपयांनी महाग होणार आहे. कंपनीने दुधाचे भाव वाढवण्याचा निर्णय घेतला आहे. गुजरात को-ऑपरेटिव्ह मिल्क मार्केटिंग फेडरेशन (GCMMF)चे व्यवस्थापकीय संचालक आर. एस. सोढी यांनी एएनआय वृत्तसंस्थेला ही माहिती दिली.

यापूर्वी मार्च २०१७ मध्ये अमूल दुधाचे दर वाढले होते. अमूलचं टोंड मिल्क (अमूल ताजा) ४२ रुपये प्रति लीटर तर फुल क्रीम मिल्क (अमूल गोल्ड) ५२ रुपये प्रति लीटर दराने मिळतं. मंगळवारपासून टोंड मिल्क ४४ रुपये प्रति लीटर तर फुल क्रीम मिल्क ५४ रुपये प्रति लीटर दराने मिळेल.



अमूल सध्या महाराष्ट्रासह गुजरात, पश्चिम बंगाल, उत्तराखंड, दिल्ली-एनसीआर सह अन्य राज्यांत विविध ब्रँड नावांनी दूध विकते. दुधाचे भाव दोन वर्षांनंतर वाढवले आहेत. दूध उत्पादनांना जास्त किंमत मिळवून देणं हा यामागचा उद्देश असल्याचं कंपनीनं सांगितलं.