Rutuja Latke : ऋतुजा लटके यांची उमेदवारी धोक्यात?, आज हायकोर्टात होणार सुनावणी

म. टा. विशेष प्रतिनिधी, मुंबई ः मुंबई महापालिकेतील लिपिकपदाचा ३ ऑक्टोबरला राजीनामा देऊनही पालिका प्रशासनाने अद्याप तो स्वीकारला नसल्याने आणि अंधेरी पूर्व विधानसभा मतदारसंघाच्या (१६६) पोटनिवडणुकीसाठी उमेदवारी अर्ज भरण्याची अंतिम तारीख १४ ऑक्टोबर असल्याने अडचणीत सापडलेल्या ऋतुजा रमेश लटके यांनी अखेर बुधवारी मुंबई उच्च न्यायालयात धाव घेतली. 'मला निवडणूक लढवता येऊ नये या हेतूनेच राजीनामा मंजूर करून तसे पत्र किंवा आदेश देण्यास विलंब केला जात असल्याचे दिसत आहे. महापालिकेची ही वर्तणूक कुहेतूपर्वक, बेकायदा व मनमानी आहे', असा आरोप ऋतुजा यांनी याचिकेत केला आहे. याबाबत आज, गुरुवारी न्या. नितीन जामदार व न्या. शर्मिला घुगे यांच्या खंडपीठासमोर सुनावणी होणार आहे.

२०१७च्या निवडणुकीत शिवसेनेच्या तिकिटावर निवडून आलेले ऋतुजा यांचे पती रमेश लटके यांचे ११ मे रोजी अकाली निधन झाले. त्यामुळे शिवसेनेने (उद्धव बाळासाहेब ठाकरे) पोटनिवडणुकीसाठी ऋतुजा यांना तिकीट दिले आहे. मात्र, १५ जून २००६पासून महापालिकेच्या सेवेत असलेल्या ऋतुजा यांना मुंबई महापालिका सेवा (वर्तणूक) नियमावलीतील नियम-६ अन्वये सेवेत असेपर्यंत निवडणूक लढण्यास मज्जाव आहे. म्हणून निवडणुकीचा निकाल लागेपर्यंत नियम-६च्या आडकाठीतून मुभा द्यावी, असे पत्र त्यांनी २ सप्टेंबरला महापालिका आयुक्तांना लिहिले होते. परंतु, त्यांची ती विनंती पालिकेने २२ सप्टेंबरच्या आदेशाने फेटाळून २९ सप्टेंबरला त्यांना त्याबाबत कळवले. त्यानंतर ३ ऑक्टोबरला निवडणूक आयोगाने अंधेरी पूर्वची पोटनिवडणूक जाहीर केल्याने ऋतुजा यांनी त्याच दिवशी सहायक आयुक्तांकडे आपल्या कर्मचारी पदाचा राजीनामा दिला.

भगव्याच्या पाठीशी लाल बावटा, तब्बल ५२ वर्षांनंतर भाकपचा-शिवसेनेला पाठिंबा

ऋतुजा यांनी अॅड. प्रभाकर जाधव यांच्यामार्फत केलेल्या रिट याचिकेनुसार, एक महिन्याचा नोटीस कालावधी शिथिल करून राजीनामा मंजूर करण्याची विनंती के-पश्चिम वॉर्डच्या सहायक आयुक्तांना त्यांनी केली होती. मात्र, त्यांनी राजीनामा पत्र सामान्य प्रशासन विभागाच्या सहायक आयुक्तांकडे पाठवले. त्यांनी ऋतुजा यांची काही थकबाकी नाही आणि त्यांच्याविरोधात काही चौकशी प्रलंबित नाही ना, याबाबतची प्रमाणपत्रे मिळवण्यास सांगितले. तशी प्रमाणपत्रे आल्यानंतर ऋतुजा यांच्याकडे नोटीस कालावधीच्या एक महिन्याच्या वेतनापोटी ६७ हजार ५९० रुपये भरण्यास सांगण्यात आले. ती रक्कम त्यांनी १० ऑक्टोबरला भरली. 'ही सर्व प्रक्रिया पूर्ण झाल्यानंतर सातत्याने पाठपुरावा करूनही अद्याप राजीनामा स्वीकारल्याचे पत्र किंवा आदेश मला देण्यात आला नाही. म्हणून मला नाईलाजाने उच्च न्यायालयात धाव घ्यावी लागली आहे. त्यामुळे माझा राजीनामा तात्काळ स्वीकारण्याचा आदेश पालिकेला द्यावा आणि मला निवडणुकीचा उमेदवारी अर्ज भरण्याची परवानगी द्यावी', अशी विनंती ऋतुजा यांनी याचिकेत केली आहे.

ऋतुजा लटकेंच्या राजीनाम्यावरून घणाघात, 'शिंदे-फडणवीसांच्या ट्रीगर पॉईंटवर आयुक्त चहल'