म. टा. विशेष प्रतिनिधी, मुंबई आरोग्ययंत्रणेमध्ये सर्वात महत्त्वाचा भाग असलेल्या राज्यातील अंगणवाडी सेविकांचे डिसेंबर महिन्यातील मानधन आणि पंतप्रधानांनी संमत केलेली अतिरिक्त वाढही अद्याप रखडली आहे. त्यामुळे राज्यातील वाढते आजार, लहान मुलांसह गर्भवती मातांच्या आरोग्याची काळजी घेणाऱ्या या आरोग्यसेविकांपुढे आता स्वतःचे कुटुंब कसे चालवायचे हा प्रश्न उपस्थित झाला आहे. राज्यामध्ये एक लाख अंगणवाडी सेविका आणि तितक्याच मदतनीस आहेत. पंधराशे रुपयांची वाढ ऑक्टोबर २०१८ मध्ये संमत करण्यात आली, मात्र मागील दहा महिन्यांपासून ही थकबाकी देण्यात आली नाही. सरकारने साडेसहा हजार अंगणवाडीसेविकांची पदे भरण्याचा निर्णय़ घेतला होता. या प्रक्रियेचीही अद्याप सुरुवात करण्यात आलेली नाही. अंगणवाडी सेविकांच्या प्रश्नांकडे पाहण्याचा सरकारचा उदासीन दृष्टिकोन कायम आहे, अशी खंत अंगणवाडी कृती समितीच्या एम. ए. पाटील यांनी व्यक्त केली. महाराष्ट्र सरकारने समान किमान कार्यक्रमामध्ये अंगणवाडी कर्मचाऱ्यांच्या मानधनामध्ये वाढ करण्यात येईल, असे स्पष्ट केले होते. सेवाशर्थी सुधारण्यात येतील असाही स्पष्टपणे उल्लेख केला होता. मात्र मानधनवाढीच्या संदर्भात अद्याप राज्यामध्ये समानता आलेली नाही. केरळ, तेलंगण, हरयाणा, दिल्ली याठिकाणी अंगणवाडी सेविकांना जितके पैसे दिले जातात, ही रक्कम महाराष्ट्रामध्ये दिली जात नाही.
अंगणवाडी सेविका मानधनाविना
म टा...
महाराष्ट्र टाइम्स.कॉम 8 Feb 2020, 4:00 am