...तर सरकारला मातांचे शाप लागतील!

मटा ऑनलाइन वृत्त । मुंबई

मानधनवाढीसह विविध मागण्यांसाठी संपावर असलेल्या अंगणवाडी सेविकांच्या आंदोलनाला शिवसेनेने पाठिंबा दिला असून शिवसेना पक्षप्रमुख उद्धव ठाकरे यांनी आज आझाद मैदानात जाऊन मोर्चेकरी अंगणवाडी सेविकांची भेट घेतली. यावेळी शिवसेनेची भूमिका स्पष्ट करताना उद्धव यांनी सरकारवर जोरदार निशाणा साधला. 'अंगणवाडी सेविका आई बनून कुपोषित बालकांचं पालन-पोषण करतात. असे असताना त्यांचे आंदोलन मोडण्यासाठी ठोकशाही करणार असाल तर या माता-भगिनींचे शाप तुम्हाला लागल्याशिवाय राहणार नाहीत', अशा शब्दांत उद्धव यांनी तोफ डागली.

मी येथे नेतृत्व करायला आलेलो नाही तर तुमच्या नेतृत्वाला बळ द्यायला आलो आहे. तुमच्यात सरकारला नमवण्याची ताकद आहे. तेव्हा तुम्ही खचून जाऊ नका. तुम्ही आंदोलनाची जी दिशा ठरवाल त्यात शिवसेना तुमच्यासोबत असे, अशा शब्दांत उद्धव यांनी अंगणवाडी सेविकांना बळ दिलं. इकडे लाडू द्या नाहीतर चिक्की द्या पण कृपा करून हा प्रश्न प्रतिष्ठेचा करू नका, असे आवाहनही उद्धव यांनी मुख्यमंत्री देवेंद्र फडणवीस यांना केले. आंदोलनकारी माता-भगिनींची झोप उडवून मुख्यमंत्री स्वत:ची स्वप्ने साकारायला दौरे करत आहेत, असा टोलाही उद्धव यांनी लगावला.

वेडा झालेला विकास परवडणार नाही!

'विकास वेडा झाला आहे' असा टोला लगावत काँग्रेस उपाध्यक्ष राहुल गांधी यांनी पंतप्रधान नरेंद्र मोदी यांच्या घोषणांची खिल्ली उडवली होती. तो धागा पकडत 'वेडा झालेला विकास राज्याला आणि देशाला परवडणार नाही' असा निशाणा उद्धव यांनी साधला.