प्रीती राठी अॅसिडहल्ला: अंकुर पनवारला फाशी

मटा ऑनलाइन वृत्त । मुंबई

मुंबईत २०१३ मध्ये झालेल्या प्रीती राठी अॅसिड हल्ल्याप्रकरणी दोषी अंकुर पनवार याच्या गुन्ह्याचे स्वरूप गंभीर असल्याचे मान्य करत सत्र न्यायालयाने त्याला फाशीची शिक्षा सुनावली आहे. या निकालानंतर प्रीतीला न्याय मिळाल्याची भावना तिच्या कुटुंबियांकडून व्यक्त करण्यात येत होती.

अॅसिडहल्ल्याने चेहरा, श्वसनयंत्रणेसह विविध अवयव निकामी झालेल्या प्रीती राठीच्या अपराध्याची सैतानी वृत्तीच अंकुरच्या कृत्यातून दिसून येते. अशा गुन्हेगारांना फाशी दिल्यास समाजामध्ये जरब बसेल, असे प्रतिपादन विशेष सरकारी वकील उज्ज्वल निकम यांनी बुधवारी सत्र न्यायालयापुढे केले होते. तर आरोपीच्या वकिलांनी आरोपीचे वय लक्षात घेता त्याला कमी शिक्षा देण्याची विनंती केली होती. याप्रकरणी दोन्ही पक्षांचे युक्तिवाद संपल्याने आज, गुरुवारी शिक्षा सुनावण्यात आली.

अॅसिड हल्ल्याचा घटनाक्रम

प्रीतीवर अॅसिड फेकण्यासाठी आरोपीने दिल्लीतून एप्रिल, २०१३ मध्ये सल्फुरिक अॅसिड विकत घेतले. मात्र त्याने दिल्लीत त्याचा वापर न करता प्रीती वांद्रे येथे गरीबरथ एक्स्प्रेसने उतरल्यावर ते तिच्यावर फेकले. त्याअगोदर त्याने प्रीतीला दिल्लीत धमकी दिली होती. त्याने मार्च, २०१३ मध्ये एकतर्फी प्रेमाला होकार न दिल्यास त्याचे परिणाम गंभीर होतील, असे त्याने म्हटले होते. १ मे २०१३ ला प्रीती दिल्लीहून मुंबईत नोकरीसाठी आली असता त्याच गाडीने त्याने तिचा पाठलाग करून २ मे २०१३ रोजी सकाळी वांद्रे स्थानकात उतरताना तिच्यावर अॅसिड फेकले.