मध्य रेल्वेवर आणखी २१० सीसीटीव्ही

म. टा. खास प्रतिनिधी, मुंबई

मध्य रेल्वेवर प्रवाशांच्या सुरक्षेसाठी आणखी २१० सीसीटीव्ही कॅमेरे बसविण्यात येणार आहेत. ही प्रक्रिया सुरू करण्यात आली असून ऑक्टोबर २०१८पर्यंत सर्व कॅमेरे बसविण्याचे काम पूर्ण होणार आहे.

रेल्वे स्थानकात एखादा गुन्हा घडल्यास तपासामध्ये सीसीटीव्ही कॅमेऱ्यांची मदत होते. गुन्ह्याच्या तपासाबरोबर रेल्वे प्रवाशांच्या सुरक्षेसाठी मध्य रेल्वेच्या स्थानकांमध्ये सध्या दोन हजार ९४१ सीसीटीव्ही कॅमेरे बसविण्यात आले आहेत. यातील ९४१ कॅमेरे हे इंटिग्रेटेड सिक्युरिटी सिस्टीम अंतर्गत आहेत. गेल्या काही वर्षांत प्रवाशांची सातत्याने वाढत जाणारी संख्या आणि रेल्वे हद्दीतील गुन्हे पाहता सीसीटीव्ही कॅमेऱ्यांची संख्या वाढविण्याचा निर्णय मध्य रेल्वेने घेतला आहे. एल्फिन्स्टन रोड स्थानकातील दुर्घटनेनंतर नेमण्यात आलेल्या समितीने १७ स्थानकांत अतिरिक्त सीसीटीव्हींची गरज असल्याचे सांगितले होते. १७ स्थानकांमध्ये हार्बर मार्गावरील १३ स्थानकांचा समावेश आहे. यात वडाळा, किंग्ज सर्कल, शिवडी, कॉटन ग्रीन, डॉकयार्ड, वाशी, सानपाडा, पनवेल, खांदेश्वर, खारघर, मानसरोवर या स्थानकांचा समावेश आहे. या स्थानकांबरोबर मुख्य मार्गावरील कुर्ला, ठाणे, कल्याणसह अन्य काही स्थानकात सीसीटीव्ही कॅमेऱ्यांची संख्या वाढणार आहे.