sameer.karve@timesgroup.com
@sameerkarveMT
मुंबई : अँजिओप्लास्टी उपचारात वापरण्यात येणाऱ्या कॅथेटरचा खासगी रुग्णालयांमध्ये रुग्णांची संमती न घेताच पुनर्वापर केला जात असल्याचे महिनाभरापूर्वी उघड झाले होते. अन्न व औषध प्रशासनाने (एफडीए) याच प्रकरणात आणखी तपास केला असता आता गायडिंग कॅथेटरचा नवा घोटाळा समोर आला आहे.
अधिकृत वितरणसाखळीतून आलेल्या कॅथेटर्सची वाटमारी सुरू असून तो साठा बेकायदा पद्धतीने हस्तगत करून त्याची राजरोस विक्री करण्याचे रॅकेट फोफावले असल्याचे एफडीएच्या तपासात उघड झाले आहे. याप्रकरणी गुन्हा दाखल करण्यात आला असून या प्रकरणात साडेआठ लाख रुपयांचे कॅथेटर्स नेमके कुठून मागविण्यात आले व ते वितरणसाखळीत आलेच कसे, त्याचा कोणताही पुरावा परवानाधारकांना देता आलेला नाही.
या प्रकरणी डोंबिवलीचे कॅथेटर वितरक मे. पार्श्वनाथ डिस्ट्रीब्युटर्स यांच्यावर बनावट बॅचनंबरच्या औषधसामग्रीची विक्री झाल्याप्रकरणी तसेच जीवरक्षक शस्त्रक्रियेसाठीच्या औषधसामग्रीत गैरव्यवहार केल्याप्रकरणी औषधे व सौंदर्यप्रसाधने कायद्यांतर्गत दखलपात्र गुन्हा दाखल करावा, असे आदेश एफडीएचे मावळते आयुक्त डॉ. हर्षदीप कांबळे यांनी दिले. काही कॅथेटर वितरक हे बेकायदा रीतीने वैद्यकसामग्रीचा साठा मागवून वाटमारी करीत असल्याची खबर आयुक्त डॉ. कांबळे यांना काही दिवसांपूर्वी मिळाली होती. त्यानुसार त्यांनी गुप्तवार्ता विभागाच्या सहायक आयुक्त माधुरी पवार, औषध निरीक्षक धनंजय जाधव, के. जी. गादेवार व निशिगंधा पाष्टे यांच्या पथकास सखोल तपासाचे निर्देश दिले होते. हे पथक महाराष्ट्राप्रमाणेच दिल्लीतही तपासासाठी जाऊन आले.
डोंबिवलीच्या पार्श्वनाथ डिस्ट्रीब्युटर्सनी अँजिओप्लास्टीमध्ये लागणाऱ्या गायडिंग कॅथेटरची विक्री केली होती, मात्र हे कॅथेटर्स आणले कुठून, त्याची खरेदी बिले त्यांच्याकडे नव्हती. तपास सुरू केल्यावर त्यांनी दिल्लीच्या ईरा लाइफलायन्सेसकडून कॅथेटर आणल्याची माहिती दिली. मात्र एफडीएचे चौकशी पथक दिल्लीत एरा लाइफसायन्सेसकडे गेले असता पार्श्वनाथच्या व्यवहारांची कोणतीच खातरजमा होऊ शकली नाही.
या कॅथेटरचे एकमेव आयातदार जॉन्सन अॅन्ड जॉन्सन यांच्याकडेही एफडीए पथकाने चौकशी केली असता दोन बॅचेसपैकी एका बॅचक्रमांकाचा साठा त्यांनी कधी आयातच केला नव्हता व दुसरी बॅच मेमध्ये आयात केली होती, असे कळले. मेमध्ये आयात केलेल्या बॅचची त्याआधीच विक्री केल्याचेही आढळले. एकूणच ही कॅथेटर्स कुठून आली, ते सिध्द होऊ शकले नाही. गायडिंग कॅथेटर अनधिकृतपणे खरेदी केले असल्यास त्याचा रुग्णांना अपाय होऊ शकतो व ही बाब जनतेच्या आरोग्याच्या दृष्टीने अत्यंत घातक आहे, असा ठपका एफडीएच्या पथकाने त्यांच्या चौकशीत ठेवला. त्यानुसार सदर डिस्ट्रिब्युटरविरुध्द कारवाई करण्यात आली.
रुग्णालयातून वाटमारी?
विविध रुग्णालयांमध्ये येणाऱ्या कॅथेटरच्या साठ्यामधूनच हेराफेरी करून त्या वाटमारीतून जमा झालेले कॅथेटर अशा प्रकारे विक्रीस येत असावेत व त्यामुळेच या डिस्ट्रीब्युटरकडे कॅथेटर्स सवलतीच्या दरात दिले जात असावेत, असा संशय आयुक्त डॉ. हर्षदीप कांबळे यांनी व्यक्त केला. या कॅथेटरची आवक झाली कुठून, याविषयी आयुक्तांनी तीन शक्यता वर्तविल्या. एक तर काही रुग्णालयांमध्ये कॅथेटर वापरल्याचे रेकॉर्डवर दाखविले जात असेल, परंतु ते वापरलेच जात नसतील व हे कॅथेटर डिस्ट्रीब्युटरकडे येत असतील. किंवा एकच कॅथेटर निर्जंतुकीकरणाने दोन-तीन रुग्णांवर वापरायचा व नवीन कॅथेटरचे बिल लावायचे, परंतु प्रत्यक्षात सेकन्ड्सचा माल वापरायचा व त्यातून हाती आलेल्या नव्या कॅथेटरची छुप्या बाजारात विक्री करायची. तिसरी शक्यता म्हणजे, वेगवेगळ्या ठिकाणांहून कॅथेटर जमा करायचे व त्यांची कमी दरात विक्री करायची. स्थानिक कंपन्यांकडून कॅथेटर तयार करून घ्यायचे व त्याला बड्या कंपन्या, वितरक यांची बिले लावून ते विकायचे, असाही प्रकार कदाचित केला जात असावा, अशीही एक शक्यता आहे.
@sameerkarveMT
मुंबई : अँजिओप्लास्टी उपचारात वापरण्यात येणाऱ्या कॅथेटरचा खासगी रुग्णालयांमध्ये रुग्णांची संमती न घेताच पुनर्वापर केला जात असल्याचे महिनाभरापूर्वी उघड झाले होते. अन्न व औषध प्रशासनाने (एफडीए) याच प्रकरणात आणखी तपास केला असता आता गायडिंग कॅथेटरचा नवा घोटाळा समोर आला आहे.
अधिकृत वितरणसाखळीतून आलेल्या कॅथेटर्सची वाटमारी सुरू असून तो साठा बेकायदा पद्धतीने हस्तगत करून त्याची राजरोस विक्री करण्याचे रॅकेट फोफावले असल्याचे एफडीएच्या तपासात उघड झाले आहे. याप्रकरणी गुन्हा दाखल करण्यात आला असून या प्रकरणात साडेआठ लाख रुपयांचे कॅथेटर्स नेमके कुठून मागविण्यात आले व ते वितरणसाखळीत आलेच कसे, त्याचा कोणताही पुरावा परवानाधारकांना देता आलेला नाही.
या प्रकरणी डोंबिवलीचे कॅथेटर वितरक मे. पार्श्वनाथ डिस्ट्रीब्युटर्स यांच्यावर बनावट बॅचनंबरच्या औषधसामग्रीची विक्री झाल्याप्रकरणी तसेच जीवरक्षक शस्त्रक्रियेसाठीच्या औषधसामग्रीत गैरव्यवहार केल्याप्रकरणी औषधे व सौंदर्यप्रसाधने कायद्यांतर्गत दखलपात्र गुन्हा दाखल करावा, असे आदेश एफडीएचे मावळते आयुक्त डॉ. हर्षदीप कांबळे यांनी दिले. काही कॅथेटर वितरक हे बेकायदा रीतीने वैद्यकसामग्रीचा साठा मागवून वाटमारी करीत असल्याची खबर आयुक्त डॉ. कांबळे यांना काही दिवसांपूर्वी मिळाली होती. त्यानुसार त्यांनी गुप्तवार्ता विभागाच्या सहायक आयुक्त माधुरी पवार, औषध निरीक्षक धनंजय जाधव, के. जी. गादेवार व निशिगंधा पाष्टे यांच्या पथकास सखोल तपासाचे निर्देश दिले होते. हे पथक महाराष्ट्राप्रमाणेच दिल्लीतही तपासासाठी जाऊन आले.
डोंबिवलीच्या पार्श्वनाथ डिस्ट्रीब्युटर्सनी अँजिओप्लास्टीमध्ये लागणाऱ्या गायडिंग कॅथेटरची विक्री केली होती, मात्र हे कॅथेटर्स आणले कुठून, त्याची खरेदी बिले त्यांच्याकडे नव्हती. तपास सुरू केल्यावर त्यांनी दिल्लीच्या ईरा लाइफलायन्सेसकडून कॅथेटर आणल्याची माहिती दिली. मात्र एफडीएचे चौकशी पथक दिल्लीत एरा लाइफसायन्सेसकडे गेले असता पार्श्वनाथच्या व्यवहारांची कोणतीच खातरजमा होऊ शकली नाही.
या कॅथेटरचे एकमेव आयातदार जॉन्सन अॅन्ड जॉन्सन यांच्याकडेही एफडीए पथकाने चौकशी केली असता दोन बॅचेसपैकी एका बॅचक्रमांकाचा साठा त्यांनी कधी आयातच केला नव्हता व दुसरी बॅच मेमध्ये आयात केली होती, असे कळले. मेमध्ये आयात केलेल्या बॅचची त्याआधीच विक्री केल्याचेही आढळले. एकूणच ही कॅथेटर्स कुठून आली, ते सिध्द होऊ शकले नाही. गायडिंग कॅथेटर अनधिकृतपणे खरेदी केले असल्यास त्याचा रुग्णांना अपाय होऊ शकतो व ही बाब जनतेच्या आरोग्याच्या दृष्टीने अत्यंत घातक आहे, असा ठपका एफडीएच्या पथकाने त्यांच्या चौकशीत ठेवला. त्यानुसार सदर डिस्ट्रिब्युटरविरुध्द कारवाई करण्यात आली.
रुग्णालयातून वाटमारी?
विविध रुग्णालयांमध्ये येणाऱ्या कॅथेटरच्या साठ्यामधूनच हेराफेरी करून त्या वाटमारीतून जमा झालेले कॅथेटर अशा प्रकारे विक्रीस येत असावेत व त्यामुळेच या डिस्ट्रीब्युटरकडे कॅथेटर्स सवलतीच्या दरात दिले जात असावेत, असा संशय आयुक्त डॉ. हर्षदीप कांबळे यांनी व्यक्त केला. या कॅथेटरची आवक झाली कुठून, याविषयी आयुक्तांनी तीन शक्यता वर्तविल्या. एक तर काही रुग्णालयांमध्ये कॅथेटर वापरल्याचे रेकॉर्डवर दाखविले जात असेल, परंतु ते वापरलेच जात नसतील व हे कॅथेटर डिस्ट्रीब्युटरकडे येत असतील. किंवा एकच कॅथेटर निर्जंतुकीकरणाने दोन-तीन रुग्णांवर वापरायचा व नवीन कॅथेटरचे बिल लावायचे, परंतु प्रत्यक्षात सेकन्ड्सचा माल वापरायचा व त्यातून हाती आलेल्या नव्या कॅथेटरची छुप्या बाजारात विक्री करायची. तिसरी शक्यता म्हणजे, वेगवेगळ्या ठिकाणांहून कॅथेटर जमा करायचे व त्यांची कमी दरात विक्री करायची. स्थानिक कंपन्यांकडून कॅथेटर तयार करून घ्यायचे व त्याला बड्या कंपन्या, वितरक यांची बिले लावून ते विकायचे, असाही प्रकार कदाचित केला जात असावा, अशीही एक शक्यता आहे.