गर्भवती महिलांसाठी मुंबई पालिकेचे अॅप

आई होणे म्हणजे प्रत्येक महिलेच्या आयुष्यातील सर्वांत मोठा आनंदाचा क्षण! गर्भवती महिला असो किंवा नवजात शिशुची आई, प्रत्येकीला आपल्या बाळाचे आरोग्य सुदृढ असावे, अशी इच्छा असणे स्वाभाविक आहे. यासाठी इंटरनेटवर उपलब्ध असलेल्या संबंधित माहितीचा वापर होऊ शकतो. मात्र, ही माहिती शास्त्रशुद्ध असेलच असे नाही. ही बाब लक्षात घेऊन मुंबई महापालिकेने तज्ज्ञ डॉक्टर व संबंधित क्षेत्रात काम करणाऱ्या संस्थांच्या मदतीने गर्भवती महिला आणि स्तनदा माता यांना शास्त्रशुद्ध माहिती देणारे एक बहुपयोगी अॅन्ड्रॉइड अॅप तयार केले आहे...

अॅप ठरणार मार्गदर्शक

आईच्या दुधात बाळाच्या वाढीसाठी आवश्यक असणारी सर्व पोषकतत्वे असतात. त्यामुळे बाळ जन्मल्यापासून ते सहा महिन्यांचे होईपर्यंत निव्वळ स्तनपान देण्याची गरज असते. तसेच पाणी देण्याची आवश्यकता नसते. आईचे दूध योग्य प्रमाणात मिळाल्यास ते मूल अधिक निरोगी होते. या बाबी लक्षात घेऊन हे माहितीपूर्ण अॅप तयार करण्यात आले आहे.

यांनी तयार केले अॅप

पालिकेचे केईएम रुग्णालय व सेठ गो. सुं. वैद्यकीय महाविद्यालयाच्या पुढाकाराने तसेच युनिसेफ, ब्रेस्टफीडिंग प्रमोशन्स नेटवर्क ऑफ इंडिया आणि मुंबई ब्रेस्टफीडिंग प्रमोशन कमिटी यांच्या सहकार्याने गर्भवती आणि स्तनदा माता यांना उपयोगी ठरेल असे शिशुपोषण (ShishuPoshan) हे अॅन्ड्रॉइड अॅप तयार करण्यात आले आहे. येत्या २ ऑगस्ट रोजी जागतिक स्तनपान सप्ताहाच्या शुभारंभ कार्यक्रमात या अॅपचे लोकार्पण करण्यात येणार आहे.

आईचे दूध जणू अमृत!

बाळाला स्तनपान कसे द्यावे? ते देताना कोणती काळजी घ्यावी? स्तनपानाच्या दृष्टीने कोणया गोष्टी महत्त्वाच्या आहेत? स्तनपानाने मुलांच्या आरोग्याला कसा व कोणता उपयोग होतो? तसेच नोकरदार महिलांनी स्तनपान कसे सुरू ठेवावे? यासारख्या अनेक प्रश्नांची उत्तरे साध्या सोप्या भाषेत या अॅपवर उपलब्ध आहेत. बाळाची सुयोग्य व निकोप वाढ होण्यासाठी सर्वसाधारण काळजी काय घ्यावी? मातेचा आहार कसा असावा? पूरक आहार आणि पोषण म्हणजे काय? यासारख्या आई व बाळाशी संबंधित असणाऱ्या विविध बाबींवर शास्त्रशुद्ध माहितीही अॅपवर देण्यात आली आहे.

डाऊनलोड करा!

हे अॅप गुगल प्ले स्टोअरवर मोफत उपलब्ध करून देण्यात आले आहे. गुगल प्ले स्टोअरवर ShishuPoshan या नावाने सर्च करून अॅप आपल्या अॅन्ड्रॉइड स्मार्ट फोनवर डाऊनलोड व इन्स्टॉल करता येणार आहे. अॅपवर हिंदी, मराठी व इंग्रजी अशा तिन्हीं भाषांमध्ये माहिती उपलब्ध आहे, अशी माहिती केईएम रुग्णालयाच्या जनऔषधशास्त्र विभागातील प्राध्यापिका डॉ. कामाक्षी भाटे यांनी दिली आहे.