म. टा. खास प्रतिनिधी, मुंबई
दिल्ली पोलिसांच्या विशेष पथकाने मुंबईसह देशभरातून सहा जणांना अटक करून दहशतवाद्यांचे पाकिस्तान मॉड्युल उघडकीस आणल्यानंतर याच सहा जणांच्या संपर्कात असलेल्यांची धरपकड अद्याप सुरूच आहे. जोगेश्वरी येथील झाकीर शेख याला अटक केल्यानंतर महाराष्ट्र एटीएसच्या पथकाने रविवारी मुंब्रा येथून रिझवान याला अटक केली. झाकीर आणि रिझवानवर घातपाताच्या कटामध्ये मोठी जबाबदारी सोपवण्यात येणार होती, अशी माहिती एटीएसच्या सूत्रांनी दिली.
दिल्ली पोलिसांनी चार दिवसांपूर्वी सहा दहशतवाद्यांना देशाच्या वेगवेगळ्या भागातून अटक केली. यातील जान मोहम्मद शेखला मुंबईच्या धारावीमधून पकडण्यात आले. दिल्ली पोलिसांनी मुंबईत येऊन कारवाई केल्यानंतर महाराष्ट्र एटीएस कामाला लागले. जानच्या संपर्कात असलेल्या जोगेश्वरी येथील जाकीरला नागपाडा येथून पकडण्यात आले. दिल्ली पोलिसांच्या कारवाईनंतर झाकीर मुंबईबाहेर पळण्याच्या तयारीत असल्याची कुणकुण लागल्यानेच त्याचा ताबा घेण्यात आल्याचे एटीएसच्या अधिकाऱ्यांनी सांगितले. झाकीरच्या चौकशीमध्ये रिझवान मोमीन याचे नाव पुढे आले. मूळचा वांद्रे येथील असलेला रिझवान मुंब्रा येथे कोचिंग क्लास चालवत असल्याची माहिती मिळाली. त्यानुसार एटीएसच्या पथकाने त्याला ताब्यात घेतले.
झाकीर आणि रिझवान या दोघांना एटीएसच्या अधिकाऱ्यांनी सोमवारी न्यायालयात हजर केले. दोघांची न्यायालयाने ४ ऑक्टोबरपर्यंत न्यायालयीन कोठडीत रवानगी केली आहे. पाकिस्तानी गुप्तचर संघटनेच्या इशाऱ्यावर अंडरवर्ल्ड डॉन दाऊद इब्राहिमचा भाऊ अनीस इब्राहिम याच्या सांगण्यावरून हे दोघे काम करीत होते. पाकिस्तान मॉड्युलचा घातपाताचा कट प्राथमिक स्थितीत असला तरी त्यासाठी असलेल्या स्लीपर सेलला शस्त्रे आणि स्फोटके पोहोचविण्याची जबाबदारी या दोघांकडे सोपविण्यात येणार होती, अशी माहिती मिळत आहे. यामध्ये आणखी काहींचा समावेश असण्याची शक्यता असून, एटीएसचे अधिकारी अशा संशयितांचा शोध घेत आहेत.
मोबाइलचे केले तुकडे
रिझवानकडे झाकीरची काही महत्त्वाची कागदपत्रे सापडली. पोलिस आपल्यापर्यंत पोहोचतील म्हणून त्याने झाकीरचा मोबाइल तोडून जवळील नाल्यात फेकला होता. एटीएसच्या अधिकाऱ्यांनी दोन तुकड्यांमधील हा मोबाइल अथक प्रयत्नांनी शोधून काढला आहे. यातून काही माहिती मिळविण्याचा प्रयत्न फोरेन्सिक लॅबच्या मदतीने केला जाणार आहे.
दिल्ली पोलिसांच्या विशेष पथकाने मुंबईसह देशभरातून सहा जणांना अटक करून दहशतवाद्यांचे पाकिस्तान मॉड्युल उघडकीस आणल्यानंतर याच सहा जणांच्या संपर्कात असलेल्यांची धरपकड अद्याप सुरूच आहे. जोगेश्वरी येथील झाकीर शेख याला अटक केल्यानंतर महाराष्ट्र एटीएसच्या पथकाने रविवारी मुंब्रा येथून रिझवान याला अटक केली. झाकीर आणि रिझवानवर घातपाताच्या कटामध्ये मोठी जबाबदारी सोपवण्यात येणार होती, अशी माहिती एटीएसच्या सूत्रांनी दिली.
दिल्ली पोलिसांनी चार दिवसांपूर्वी सहा दहशतवाद्यांना देशाच्या वेगवेगळ्या भागातून अटक केली. यातील जान मोहम्मद शेखला मुंबईच्या धारावीमधून पकडण्यात आले. दिल्ली पोलिसांनी मुंबईत येऊन कारवाई केल्यानंतर महाराष्ट्र एटीएस कामाला लागले. जानच्या संपर्कात असलेल्या जोगेश्वरी येथील जाकीरला नागपाडा येथून पकडण्यात आले. दिल्ली पोलिसांच्या कारवाईनंतर झाकीर मुंबईबाहेर पळण्याच्या तयारीत असल्याची कुणकुण लागल्यानेच त्याचा ताबा घेण्यात आल्याचे एटीएसच्या अधिकाऱ्यांनी सांगितले. झाकीरच्या चौकशीमध्ये रिझवान मोमीन याचे नाव पुढे आले. मूळचा वांद्रे येथील असलेला रिझवान मुंब्रा येथे कोचिंग क्लास चालवत असल्याची माहिती मिळाली. त्यानुसार एटीएसच्या पथकाने त्याला ताब्यात घेतले.
झाकीर आणि रिझवान या दोघांना एटीएसच्या अधिकाऱ्यांनी सोमवारी न्यायालयात हजर केले. दोघांची न्यायालयाने ४ ऑक्टोबरपर्यंत न्यायालयीन कोठडीत रवानगी केली आहे. पाकिस्तानी गुप्तचर संघटनेच्या इशाऱ्यावर अंडरवर्ल्ड डॉन दाऊद इब्राहिमचा भाऊ अनीस इब्राहिम याच्या सांगण्यावरून हे दोघे काम करीत होते. पाकिस्तान मॉड्युलचा घातपाताचा कट प्राथमिक स्थितीत असला तरी त्यासाठी असलेल्या स्लीपर सेलला शस्त्रे आणि स्फोटके पोहोचविण्याची जबाबदारी या दोघांकडे सोपविण्यात येणार होती, अशी माहिती मिळत आहे. यामध्ये आणखी काहींचा समावेश असण्याची शक्यता असून, एटीएसचे अधिकारी अशा संशयितांचा शोध घेत आहेत.
मोबाइलचे केले तुकडे
रिझवानकडे झाकीरची काही महत्त्वाची कागदपत्रे सापडली. पोलिस आपल्यापर्यंत पोहोचतील म्हणून त्याने झाकीरचा मोबाइल तोडून जवळील नाल्यात फेकला होता. एटीएसच्या अधिकाऱ्यांनी दोन तुकड्यांमधील हा मोबाइल अथक प्रयत्नांनी शोधून काढला आहे. यातून काही माहिती मिळविण्याचा प्रयत्न फोरेन्सिक लॅबच्या मदतीने केला जाणार आहे.