म. टा. विशेष प्रतिनिधी, मुंबई
जवळपास १३ वर्षांपूर्वी शिवसेनेचे नगरसेवक कमलाकर जामसंडेकर यांची त्यांच्या घरात घुसून गोळीबार करीत हत्या केल्याप्रकरणी अंडरवर्ल्ड डॉन अरुण गवळी व त्याच्या साथीदारांची जन्मठेपेची शिक्षा मुंबई उच्च न्यायालयाने सोमवारी कायम केली. विशेष मोक्का न्यायालयाने २०१२मध्ये ठोठावलेल्या शिक्षेविरोधात सर्व दोषींनी केलेली अपिले न्या. भूषण धर्माधिकारी व न्या. स्वप्ना जोशी यांच्या खंडपीठाने फेटाळून लावली.
मुंबईतील घाटकोपर-असल्फा भागात राहणारे जामसंडेकर यांची २ मार्च २००७ रोजी हत्या करण्यात आली होती. पोलिसांनी तपासाअंती हल्लेखोरांना अटक केल्यानंतर अरुण गवळीला घटनेच्या जवळपास एक वर्षानंतर अटक केली होती. मुंबई पोलिसांच्या गुन्हे शाखेचे तत्कालीन प्रमुख राकेश मारिया, अतिरिक्त पोलिस आयुक्त देवेन भारती यांच्या नेतृत्वाखालील पथकाने गवळीला त्याच्या दगडी चाळीत जाऊन अटक केली होती. याप्रकरणी मोक्का न्यायालयात खटला चालल्यानंतर २०१२मध्ये सर्वांना जन्मठेपेची शिक्षा ठोठावण्यात आली होती. याविरोधात गवळीसह सुनील घाटे, साहेबराव भिंताडे, सुरेश पाटील, प्रताप गोडसे, संदीप उर्फ सँडी गांगण, श्रीकृष्ण उर्फ बाबू गुरव, विजयकुमार गिरी व अनिलकुमार गिरी या सर्वांनी अपिल केले होते.
काय होते प्रकरण?
जामसंडेकर यांचा सदाशिव सुर्वे नावाच्या व्यक्तीशी संपत्तीवरून वाद होता. सुर्वेने गवळीशी संपर्क साधला. गवळीच्या मागणीप्रमाणे सुर्वेने ३० लाख रुपयांची सुपारी दिली. त्यानंतर आपल्यावर संशय येऊ नये म्हणून ही हत्या घडवण्यासाठी गवळीने प्रतापला नवे शूटर शोधण्यास सांगितले. त्यानंतर दोघा हल्लेखोरांनी जामसंडेकर यांच्या घरात घुसून त्यांच्यावर गोळ्या झाडून त्यांची हत्या केली.