'इंद्राणीची तुरुंगात बडदास्त, मसाज मिळतो'

मटा ऑनलाइन वृत्त । मुंबई

शीना बोरा हत्याकांड प्रकरणातील आरोपी इंद्राणी मुखर्जीची तुरुंगात खास बडदास्त ठेवली जात आहे. तिला तुरूंगात फेशियल आणि मसाजसारख्या सुविधा मिळत असल्याची शंका उपस्थित करत भाजपचे मुंबई अध्यक्ष आशिष शेलार यांनी विधानसभेत गृहखात्याचे वाभाडे काढले आहे.

मंजुळा शेट्ये मृत्यूप्रकरणी विधानसभेत लक्षवेधी सुचना मांडण्यात आली. त्यावरील चर्चेत सहभाग घेताना आशिष शेलार यांनी गृह विभागाची पोलखोल करत सरकारला घरचा आहेर दिला. भायखळा कारागृहात इंद्राणी मुखर्जीला पेडिक्युअर, फेशियल आणि मसाज सारख्या सुविधा मिळाल्या. तिला या सुविधा मिळाव्यात म्हणून मंजुळा शेट्येची मदत घेतली गेल्याची चर्चा असल्याचं सांगत शेलार यांनी एकच खळबळ उडवून दिली. हे प्रकरण अत्यंत गंभीर असल्याने त्याची चौकशी करण्यात यावी अशी मागणी त्यांनी यावेळी गृहराज्यमंत्री रणजित पाटील यांच्याकडे केली.

चौकशी करणार

मंजुळा शेट्ये यांच्‍या मृतदेहावर कोणतीही जखमा नव्‍हत्‍या असा खोटा अहवाल जे जे. रुग्‍णलयातील कॅज्‍युलटी विभागाच्‍या डॉक्‍टरने दिला होता, त्‍याची चौकशी करून कारवाई करण्‍याची मागणीही त्यांनी केली. त्यावर मंजुळा शेट्ये यांच्‍या मृतदेहावर जखमा नव्‍हत्‍या असा पहिला खोटा अहवाल देणाऱ्या जे. जे. हॉस्पिटलमधील डॉक्टरची चौकशी करण्‍यात येईल तसेच इंद्राणीला कारागृहात मसाज, पेडिक्‍युअर, फेशियल अशा सुविध मिळत होत्‍या त्‍यामध्‍ये मंजुळा शेट्ये यांचा काही सहभाग होता का ? या प्रकरणीही चौकशी करण्‍यात येईल अशी ग्‍वाही पाटील यांनी विधानसभेत दिली.