आव्हाडांच्या बंगल्यावरील मारहाण प्रकरण: सीबीआयकडे तपास का देऊ नये?- हायकोर्ट

मुंबई: राज्याचे गृहनिर्माण मंत्री जितेंद्र आव्हाड यांच्या निवासस्थानी इंजिनीअरला झालेल्या मारहाण प्रकरणी आज, मुंबई उच्च न्यायालयात सुनावणी झाली. आव्हाड यांच्या निवासस्थानातील सीसीटीव्ही फुटेज जपून ठेवा, असे निर्देश न्यायालयानं पोलिसांना दिले. या प्रकरणाचा तपास सीबीआयकडे का देऊ नये, अशी विचारणाही न्यायालयानं केली.

इंजिनीअर अनंत करमुसे यांना जितेंद्र आव्हाड यांच्या निवासस्थानी मारहाण झाली होती. या प्रकरणी करमुसे यांनी पोलीस ठाण्यात तक्रार दिली होती. एफआयआरमध्ये आव्हाड यांचे नाव पोलिसांनी नोंदवले नसल्याने त्यांनी उच्च न्यायालयात धाव घेतली आहे. तसंच या प्रकरणाचा तपास सीबीआयकडे देण्याची विनंतीही त्यांनी याचिकेत केली आहे. त्यावर आज सुनावणी झाली. जितेंद्र आव्हाड यांच्या निवासस्थानातील सीसीटीव्ही फुटेज जपून ठेवावेत, असे आदेश न्यायालयाने यावेळी पोलिसांना दिले. तसंच या प्रकरणाचा तपास सीबीआयकडे का देऊ नये, अशी विचारणाही केली. न्या. गिरीश कुलकर्णी यांनी त्याबाबत राज्य सरकारला विचारणा करून, उत्तर देण्यात सांगितले आहे. आव्हाड यांच्या निवासस्थानातील फुटेज ठाणे दंडाधिकारी न्यायालयात जमा करण्याचे निर्देशही संबंधित तपास अधिकाऱ्यांना दिले. दरम्यान या प्रकरणी पुढील सुनावणी ३० एप्रिल रोजी होणार आहे.

पालघर हत्या: ...म्हणून महिला सरपंचाला धमक्या

वाइन शॉप्स सुरू करायला काय हरकत आहे?: राज

काय आहे प्रकरण?:

या प्रकरणी दाखल झालेल्या पोलिस फिर्यादीतील नोंदींनुसार, ५ एप्रिल रोजी रात्री देशातील नागरिकांनी घरातील विजेचे दिवे बंद करून पणत्या किंवा मोबाइल टॉर्च नऊ मिनिटे प्रकाशमान करावेत, असे आवाहन पंतप्रधान नरेंद्र मोदी यांनी केले होते. आव्हाड यांनी यावर टीका करणारी प्रतिक्रिया दिली होती. त्यानंतर इंजिनीअर अनंत करमुसे यांनी आव्हाड यांच्याबाबत आक्षेपार्ह पोस्ट फेसबुकवर लिहिली होती. त्याच रात्री करमुसे यांना मारहाण झाली होती.

महाराष्ट्राला बदनाम करून तुम्हाला काय मिळवायचंय?: संजय राऊत